American tuanbia ah tutan thimnak hi aa dang cem a si. Tutan thimnak hi zoh tikah political Institution (establishment) mipi nih an duh ti lo - an doh cang. Million minung hna caah Clinton hi a kuai cangmi America politics aiawhtu men bantuk a si cang.
American mipi nih kan ram politics a hmaan ti lo; a rawk tuk cang timi an i fiang tuk cang. Politician zong a si lomi Donald Trump mirum pa a vun rat tikah kan ramchung rawhralnak kan remhpiak hna lai a vun ti tikah mipi nih an zumh dih. Trump zong hi ramchung political Institution dohtu a rak si. Clinton hi a rawk tuk cangmi political inn pi cu a aiawh ve.
Clinton nih mipi lungthin a thei naisai lo. Kum sawmthum chung politics ah ka um cang a ti i, a thei ngai bantuk in Trump kha zeihmanh ah a rel ve lo, asinain Donald Trump nih cu chung vialte ah zeihmanh na tuah lo i, a tu ah maw thok naa timh tiah fak ngaiin a phomh. Mipi zong nih Trump fian ning in Clinton dirhmun an i fiang tuk.
Clinton nih a chim pengmi cu a tling bakmi candidate ka si. Bill Clinton lio ah First Lady a rak si, cun Secretary of State a si i, senator zong a si. Asinain mipi caah hmual a um ti lo. BBC Nick Byrant nih cun 'mipi tampi ka hal hna tikah political rian a tuanmi hna nak in businessman kan duh deuh' tiah a chim. Washington cungah mipi lung a tling hrimhrim ti lo.
Mipi an huatnak zong mah ruangah a si. CNN nih 'zeiruangah dah American mipi tam tuk nih Clinton hi an huat tuk' timi a tial bal cang. Clinton hi a hlan te hrimhrim zumh tlak a si lonak hi mipi lungthin ah a um cang. E-mail kongah atu le a tu ti awk in a thangchiat lengmang nih a vun chin tikah mipi thin a hunter tuk.
Tutan ah nu hrimhrim nih thathnemnak an pek tuk te lai tiah ruah a si. Nu kip nih an nu hawi president tlinter cu an pumpak chunmang tlinter bantuk a si lai. Asinain a caan a phak taktak tikah an deuh diam. Clinton nih a tei lai timi states zeimawzat hmanh ah a ni taktak ahcun a tei kho lo (e.g., North Carolina).
Cun American tampi thlennak an duh lioah amah bon a si le dirhmun thlen aa timh lo an theih fawn. Thlen timh loin term thum tiang peh than ding cu a si hrimhrim a si kho lo. Obama chan nih zeidah a chuah pi i zeidah hmailei ah a tuah lai timi an hmuh cia dih cang. Thlen hrimhrim an duh cang.
'Stronger together' slogan le 'make America great again' slogan hi an hmual ngeih zong aa dang. A rawk cangmi sysytem ah 'stronger together' timi cu sullam ngei lo a si i, thlen a haumi ah 'make Aemrica great again' timi tha a damter tukmi bia a si. Cucaah tutan i Clinton an thlak cu Obama an thlak zong a si. Trump cu an khamhtu bantuk ah an ruah dih.