Turkey ralkap lei upa nih nirukni ah an chimmi cu kan ralkap le ISIS ralkap an i kahnak ah kan ralkap pakhat a thi an ti. Kan raltuknak vanlawng nih Syria hmunkhur ISIS umnak hmur hleihnih (12) a kah ve hna tiah an chim chih.
Nilini ah khan Syrian-Russia raltuknak vanlawng nih Turkey ralkap an kah sual hna i minung pathum an ti. Turkey nih cun Syrian raltuknak vanlawng a si lai tiah an zumh. Turkey le Syria ramri hrawngah a ummi ISIS pawl hi Turkey ralkap le Syria raltho nih an doh cuahmah lio hna a si.
Turkey President Tayyip Erdogan nih Russia President Putin zong a ceih pi. Syrian President Bashar al-Assad hi Russia nih an dirkamh nain Turkey cozah nih Syrian cozah thlak a duhmi dohtu tapung an bawmh ve hna.
Syrian President Bashar al-Assad uknak hi a ramchung minung dohtu party lei nih an duh lo caah ramchung ah kahdohnak a chuah. Syrian President Assad hi Russia le Iran tbk nih an tan pi i, dohtu lei kha Turkey le US le an hawile nih an bawmh ve hna.
Fak piin an i doh caah minung tam tuk an thih pinah refugee tam tuk a chuahter. Cu lioah ISIS zong a rak chuak ve. Syria ramchung ah tapung phu in an tam ngai. Kurdish ralthon zong an rak um rih. Syrian-Russian nih hin a caan ah ISIS an kah pah hna in dohtu lei zong an kah pah chih hna.
Turkey le dohtu nih hin ISIS he Kurdish he Syrian cozah ralkap he an kah chih ve hna. Ralkap nih Turkey cozah thlak an timh i, an tlorh hnu cun Turkey nih US hi hnulei deuh ah a chit i, Russia leiah aa mer deuh cang. Nilini ah Turkey ralkap minung pali an kah hnu in cun a zual chin lengmang leiah a panh an ti. Ref: NYP.