Mosul khua pawngah thlaan pahnih an hmuh than. Mi thi ruak 250 leng an phum hna tiah police nih nilini ah an chim. November 7 ah khan thlaan an hmuh than i mi thi ruak 100 leng an rak hmuh than.
Atutan mi thi ruak an hmuhnak hi Hammam al-Alil khua ah a si i, Tigris Tiva cungah a ummi a si. Mosul he meng 19 aa hlat. A luan cia ni 10 ah khan Iraq ralkap nih ISIS kut in an lakmi a si. ISIS nih kum hnih chung an uk hna hnuah Iraq ralkap nih November 3 ah khan an chuh than hna.
Nilini i thlaan an hmuhnak cu khor chungah a si. Khor chungah ruak an hmuhmi hi 200 leng an si. Kum hnih chung ISIS nih minung thahnak le ruak voinak ah an hmanmi khor a si. Chungkhar nih an ruak an lak sual hna lai tiah a pawng vialte ah bom an chiah dih.
ISIS nih khor chungah an thlak hna ah hin cheukhat cu an thi lo i, an hma he sau pi an nun hnuah chuak kho loin an thih beh tiah Nineveh Provincial Council in Abdulrahamn al Wagga nih CNN ah a chim. Thlaan pakhat cu Hammam al- Alil pawngah an hmuh i ruak 45 an um.
Nithumni tiangah Iraq ralkap nih Tal Afar chaklei ah a ummi vanlawng hmun an lak cang. Iraq khuapi Badhdad changtu hi Mosul hi a si. Thla khat chung ISIS an doh cang hna i, Mosul in ISIS tawl dih khawhnak ding ahcun refugee buainak a chuahter ngai lai tiah an zumh. Ref: CNN.