President thimmi Doanld Trump nih a tei hnu cun Pi Hillary Clinton hi a lang tuk lem ti lo. Naite ah voikhat a rak lang than i, a hmaan lomi thawngpang (fake news) fak ngaiin a vun phomh hna.
A ruang cu a hmaan lomi thawngthanhnak nih meithal kahnak a chuahter deng. A hmaan lo ning in media pakhat nih ca an tialmi cu Pizza Restaurant hi Democratic leiin president aa cuhmi Clinton le a bawmtu John Podesta nih hngakchia a ningcang loin an tuahtonak hmun a si a ti.
Mah ruangah cun minung pakhat nih meithal he a rak luh hnawh hna. Innchung ah a lut i, meithal in kah a timh hna. Asinain minung pakhat nih police a chawnh manh hna i police an rak phan. An tlaih i, a hnuah bia an halnak ah a chimmi cu 'hngakchia sex zuarnak a si' timi thawng ka theih caah ka rat hnawhmi hna a si tiah a chim.
Restaurant ngeitu zong thah ding in thihpheihnak tampi a chuak. New York Times le Washington Post tbk tiang nih an tial hna. President thimmi Donald Trump nih National Security caah a thimmi General Mike Flynn zong 'nanmah tein tuak cio kou' tiah a tweet.
Pi Clinton nih thawngpang a theih tikah fak ngaiin mipi sinah news hmaan lo kong a chim. 'Hi bantuk news hmaan lo hi a tihnung tukmi a si caah a rannak in kan zoh colh awk a si' a ti. Ref: The Guardian.