Russia nih an rak bawmh ruangah President thimmi Donald Trump nih teinak a hmuh tiah CIA nih an phuang ruangah CIA cu fak ngaiin Trump le a team nih a vun phomh hna. 'CIA thiamthiam hi Saddam Hussein nih hriamnam tihnung a ngeih a titu an si' an ti.
American sungthoh bu le Trump cozah karlak ah theihthiam lonak a um len te lai tiah an zumh. Sungthoh bu lei nih Trump biaruahnak an timh tawn i Trump nih a al lengmang hna. Sungthoh bu le President tonnak ngeih hi a herh taktakmi a si. CNN nih a chim ning ah cun zarh khat ah voikhat lawng biaruahnak Trump nih a ngeih pi hna an ti.
Cu hlan president cu atu le atu in American sungthoh he biaruahnak an ngei lengmang. Inn Raang an luh hlan hrimhrim ah sungthoh bu he ton hi a rak biapi tuk. Zeitin dah an i runven ning a si lai; zeitin dah an himnak caah sungthoh bu nih an ven hna lai timi ruah ti kha a herh tuk.
US official nih an chimmi cu US thimnak ah Russia aa tel i, Democratic National Committee e-mail le Clinton e-mail an hack hna i, an hackmi information vialte cu Wikileaks sinah phuan ding in an pek hna tiah a chim.
President thimmi Trump nih cun 'Russia an i tel lai ka zumh lo' a ti. Thimnak ah Russia an i tel an timi hi cu politics tinawiter duh ruangah a si a ti. Ningaini ah President Obama nih thimnak ah Russia aa tel maw tel lo kan zoh than dih lai tiah nawl a chuah. Russia lei nih cun zeihmanh ah kan i tel lo an ti ve. Ref: CNN.