Real Madrid arfi Cristiano Ronald le Manchester United manager Jose Mourinho cu tax pek duh loin million in dollar tangka an hmuhmi cu British Virgin Island ah an chiah hna tiah thlithup bia chuak a um.
Asinain Ronaldo le Mourinho nih cun a hmaan lomi a si an ti. An pahnih a aiawhtu Football agency Gestifute nih a chimmi cu Cristiano Ronaldo a siah Jose Mourinho a siah tax pek dingmi vialte cu an pek ko. British le Spanish tax phung ning in tax an pek ko tiah a chim.
A chim thanmi cu 'tax an pe lo tiah Cristiano Ronaldo a siah Jose Mourinho a siah sual an puhmi vialte hi phungning tein tuanvo a latu ding nawlngeitu hna sinah kan report lai i, an kong an ceih hna lai' tiah a chim chih.
Tax pek tih ah an million dollar tangka cu ramdang British Virgin Island ah an chiah timi hi International Consortium of Journalists nih a chuahmi a si i, an hmuhmi document hi a zate in 18 million hrawng a si. Bawlung chuih thiam minthang hna min dangdang zong an i tel len hna tiah theih a si.
The European Investigative Collaborations (EIC) consortium ah aa telmi hna cu German newspaper Der Spiegel, Spain's El Mundo le UK's Sunday Times hna an si. 'Football leaks' (Bawlung chuih thiam hna thlithup chuak) timi tlangtar in a ra laimi zarh chung zongah kan chuah/phuan thluahmah lai an ti.
Hi phuannak chuah aa thoknak hi vawleicung mirum le minthang hna nih an tax an chiahnak hmun a phuan thla riat hnuah a chuakmi a si. British Virgin Island ah hin Ronaldo nih $67.7 million a chiah an ti. Mourinho nih hin British Virgin Island ngeihmi Swiss Account ah €12m (£10m) a chiah an ti. Ref: BBC.