United Nations Population Fund nih nithumni ah capar pakhat an chuah i, ISIS nih an tlaihmi hna ngaknu an tuahto ning hna kong an tial. Cu chungah kum 18 Iraq ngaknu kong an tial chih. A min deu ah cun Maha ti a si i, 2014 ah ISIS nih an rak tlaih.
A khua cu Sinjar ah a si i, 'Yazid nu le ngaknu hna cio bantukin keimah zong an kan tlaih i, ka chungkhar he then in ISIS an hruaitu sinah laksawng ah an ka pek. A ka hrem ning le a kan hman ning le a ka tuahto ning hi tihnung a si' tiah Maha nih a chim.
ISIS sin a um chungah raltha taktak in a dironh ngam lengmang. 'Nan kan tuahto ning hi zei bantuk biaknak hmanh nih an tuahmi le an cohlanmi a si lo' tiah a al chih ve tawn hna. Asinain an hrang tuk i, zeimanh ah an rel lo. An tuah duhmi paoh kha an tuah i, an thatlo ning in a um lengmang thiam ko tiah a chim.
An hruaitu nih 'a ka duh ti lo hnuah Syria ah a ummi pa sinah a ka zuar' tiah a chim. Syria ah cun ralkap nih an khamh hna. Cu hnu cun Women Center timi ah a um. 'A chim thanmi cu a hramthok ahcun hika rat zong hi ka tih i ka duh lo. Ka tonmi hi tuar awk a tha lo; ka chungkhar sin phak hmanh ka tih cang' tiah a chim.
Women Center ah cun a herhmi zohkhanhnak kip an pek pinah pyschology lei zohkhanhnak zong an pek. Dudsah tein a lungthin le ruahnak a thawn in a farnu he an i tong.
A chimmi cu 'ka naunu hmuh zong ka duh lo zeicatiah ka nu umnak kan thei ti lo i, ka nu kong a ka hal lai ti ka phang. Asinain a hnuah cun ka thinphannak cu ka tei i, ka naunu he kan i tong than kho. Atu cu ka tha tuk cang' tiah a chim.
New York i UN Headquarter meeting ah a chimmi cu 'ISIS nih an ka tuahto ning hi zeitik hmanh ah ka philh kho lai lo nain a thar in ka nunnak ka thok than cang lai. Ka umnak community kip ah keimah bantukin ISIS kut in a temtuarmi le a luatmi hna caah zohchunmi le bochanmi nu si ding in kaa zuam' tiah a chim. Ref: UNFP.