Syrian kum 7 nu Baba Alabed le a tapa te cu Syria Aleppo khua in an khamh cang hna. Syria raltuknak chung, hell ah an ummi le an thinphannak vialte hna cu hnulei ah an kal tak dih cang hna. Turkey President Erdogan nih a ton hna i, an tafar tein hmaan zong aa thlak pi hna.
Russian ralkap le Syrian ralkap nih dohtu raltho hna dornak Aleppo khua cu an kulh dih i, an chimh dih cang. Mipi luatternak UN progran chung in Baba le a chungkhar zong an luat ve. Cu hlan poah cu Bana le a chungkhar zong ralram ah an um. Twitter in vawleicung he Bana cu bia aa ruah tawn.
Bompuah thawng le meithal thawng dong loin kan pawngah kan theih lengmang. Ka umnak zong bom nih a tlak tbk in a rak chimh tawn hna. Voikhat cu twitter in ca a tial ti lo i, vawleicung a hawile zong an thinphang. Asinain a hnuah kan dam ko tiah thawng a vun thanh than hna.
UN nih naite ah Aleppo khuami chuahnak ding ah an hal bantukin mipi cu Aleppo in an chuahter hna. Turkey President Erdogan nih a aiawh zong an thlah hna i, Bana Alabed le a chungkhar nan lak hna lai tiah a fial hna i, a fial hna bantukin a sinah an rak phanh pi cang hna. A fale hlah maw an si ti awk in nuam tuk in caan a hman pi; hmaan zong aa thlak pi.
Bana le a tapa te le a chungkhar zong an him cang. Twitter ah Baba nih President Erdogan he an i tonnak hmanthlak zong a rak tar. 'Kaa lawm tuk' a ti. Aleppo hngakchia nan kan dirkamhnak le nan kan khamhnak cungah kan lung aa lawm tuk tiah vawleicung mipi sinah lunglawmhnak zong a chim.
Ram kip Twitter a hawile zong an lung aa lawm tuk i, Aleppo in a chuak cang ti thawng an theih cun ka mitthli a tla thluahmah a timi zong an um len hna. Turkey ah him tein an um cang. Turkey ah hin Syrian refugee 2.8 million hrawng an um i, Bana chungkhar zong khawika dah an um te lai timi a fiang rih lo. Ref: BBC.