Nihin ah Russia President Putin hawikawm neihniam tak a simi Senator Frantz Klintsevich nih fiang ko in kan ambassador Andrey Karlov thahnak hnulei ah NATO sungthoh an um a ti. NATO sungthoh nih khua an khan dih hnuah Turkey police Mevlut Mert Altintas, 22 nih a kahmi a si a ti.
Russia defence and security committe chairman Senator Frantz Klintsevich nih 'timh ciammam tein khua an khan dih hnuah an kahmi a si' a ti tiah Mail Online nih a report. A chim thanmi cu ''an kah lai ah hin lengah a chuak lai timi hi ahopoah nih an theihmi a si. ISIS zong an si kho or Kudish ralkap zong an si kho; anmah hi Turkey President Erdogan a ral ngaimi an si' a ti.
'Asinain a si kho chinchin rihmi cu NATO sungthoh hi an si. Ram kip ah chiahmi NATO aiawhtu sungthoh an si kho timi hi a lam a neih bik' tiah a chim than. 'Hi thil a cangmi hi thinhunnak chuahtertu taktak zong a si i, Russia caah zuamcawhtu taktak zong a si' tiah a chim chih. NATO leiin lehnak a um rih lo.
Mevlut nih a kah khawh ah a ruak kam ah a dir i, a chimmi cu 'Aleppo kha philh hlah! Syria kha philh hlah!' tiah a chim. Tlawmpal ah 'Allahu Akbar' tiah a au than, a sullam cu Pathian cu a lianngan tuk a ti. A hnuah a chim thanmi cu 'Ral thiang doh ding in Prophet Muhammad a dirkamhmi tefa cithlah kan si' a ti.
Asinain Turkey cozah nih cun US ah a zammi Muslim tlangbawi Fethullah Gulen he aa pehtlaimi a si lai tiah an zumh. Gulen hi naite i ralkap in Turkey cozah thlak aa timmi a si ti zong an lunghrinhmi a si. Asinain an hlawh a tling lo. US ah a zamnak hi 1999 khan a si. Asinain Gulen nih cun fak ngaiin hi bantuk lainawnnak cu a mawhchiat ve. Ref: The Sun.