US ambassador Samantha Power nih UN ah Russia le Iran ambassaodor hna cu khuai henh in a henh hna. Syria ah mipi an pumh hna i an kah hna tiah thawngpang an theih tikah fak taktak in UN chungah a phomh chih hna. A peh than rihmi cu 'dawhcah loin mipi nan thahmi hna hi nan ningzak lo maw' tiah a ti.
Syria khuapi a simi Aleppo hi ramchung ral a thawh khan dohtu raltho hna umnak a si. Iran le Russia bawmhnak in Syrian cozah ralkap nih an lak than cang. Mipi zong tam ngai an thah chih hna tiah theih a si tikah UN ah fak ngaiin phomh-dennak a chuak ve.
UN Secretary-General Ban Ki-moon nih Emergency Security Council an tuahnak ah a chimmi cu 'Syrian dictator Bashar al-Assade lei tang ralkap nih mipi sualnak ngei lo an thah lenmi hna thawngpang ka theih' tiah a chimh hna. 2013 in UN ah ambassador a simi Ms. Power nih 'Assad cozah, Russia le Iran hna, nan ralkap nih sualnak ngei mipi an thah hna. Nan ningzak lo maw' tiah fak taktak in a den hna.
UN ah chungtel pathum a simi nih mipi nan dum hna i nan thah hna. Nan ning an zahter hna awk a si. Ningzah hi nan thei lo taktak ko maw? Nan ning an zahter khotu thil hi a um taktak lo maw? Hngakchia tiang in nan thahmi tluk i sualnak dang a um ti lai lo. Tlawmpal tal nan chungah a lut lo maw?' tiah a phomh chih hna.
Nikhatni zan lawng hmanh ah mipi 82 an thah hna tiah UN human rights office nih a chim. Syria nih cun tapung kut in Aleppo kan luatter cang a ti. Syria President Assade thlak hi US hmuitin asinain thawng tuk in pei a dir than ko lai hi. Zeitluk in dah US a ningzah than lai. Ref: The mirror.