America nih kum 40 leng 'One China' timi hi a cohlanpiak hna i, Taiwan zong Taluk ah a ruah lengmang caah Taiwan he diplomatic pehtlaihnak a tuah lo. Asinain President thimmi Donald Trump nih 'caan sau pi kan rak zulh peng cangmi in kal lengmang a herh' ti maw a timi cu Taluk caah lungrethei ngai a vun si.
A herh ahcun Beijing, Taluk he zong in tonhchih ngamh dawh in a vun chim. Fox news nih biahalnak an ngeih lioah President thimmi Donald Trump nih a chimmi cu 'North Korea le chawlehthalnak kongah cabuai cung thut ding in Taluk a rat lo ahcun a herh ahcun a thin zong ka hunter ko lai a ti.
Taluk nih fiang ko in an leh vemi cu 'US nih One China Policy kan ngeihmi a zulh lo ahcun kan i pehtlaihnak a cat bak ve ko lai. US nih 'One China Policy' a zulh ruangah atu tiang kan i pehtlaih khawhnak a si. A zulh lo ahcun US-Taluk pehtlaihnak a dong ve lai tiah an vun hrocer ve. Taluk-US diplomatic pehtlaihnak hi 1970 hrawng in an thok cang.
'Atu ah langhter ka duhmi cu Taiwan kong an chim tikah Taluk nawlngeihnak le rum hum sinak an dohdal duh bia a si' tiah Taluk Foreign Ministry lei biachimtu Geng Shuang nih a chim. A chim thanmi cu 'Taluk-US pehtlaihnak aa hngatnak cu 'One China Policy' an cohlanmi cungah hin a si. Hihi a rawh ahcun US-Taluk pehtlaihnak biapi vialte an cat dih colh lai' a ti.
Global Times nih cun 'foreign policy kongah cun Trump hi hngakchia bantukin theihhngalhmi zeihmanh a ngei lo' a ti. A tial thanmi cu 'Trump nih hin zeihmanh a theih lo tikah a pawngkam i a khohcho taktakmi a riantuan ti hawi hruainak in tluk sual a fawi te. 'One China Policy' hi a hnursuan ahcun harsatnak taktak a alhter lai' a ti.
Taiwan hi Taluk ram dawtu hna an rak zamnak a si. 1949 ah ramchung ral a rak tho i, ram dawtu timi hna an rak zam i, cozah an dirh. Democracy phung an ser i, Taluk tu cu communist ram a si. Asinain Taluk nih cun a ram pakhat bantukin a ruah peng. Khatlei in Taiwan nih cun Taluk in luat hi a duh peng ve. Ref: CNN.