Texas i Khrihfabu ngan taktak a simi First Baptist Church Pastor Robert Jeffress nih
President Obama le Secretary of State John Kerry cu Israel ralchanh in UN vote an thlakmi kongah Veto Power in nan kham lo tiah fak taktak in a phomh hna.
President Obama le Secretary of State John Kerry cu Israel ralchanh in UN vote an thlakmi kongah Veto Power in nan kham lo tiah fak taktak in a phomh hna.
UN nih Israel ralchanh in vote an thlakmi veto power in nan kham lomi cu Pathian nan ralchanh a si tiah a ti hna. Robert Jeffress hi President thimmi Donald Trump a dirkamhmi zong a si i, a Khrihfabu First Baptist Church chungtel hi 12,000 hrawng an si. Israel le Palestinian ram cuhnak kongah bia an hal i, a lehmi hna cu 'Bible nih hi kongah tampi a chim' a ti.
'Fiang tein kan chimh lai, Louie, (biahaltu), John Kerry le Barack Obama hi tuanbia ralchanh in an um lawng si loin hi kongah cun Pathian zong an ralchanh' a ti. A chim thanmi cu 'Joel 3 kan zoh ahcun 'Pathian nih ka ram (Israel) a cheu-khuaimi ram hna cu bia ka ceih hna lai tiah Pathian nih a ti' tiah a chim.
'Caang 2 le 3 ah aa tialmi cu 'Israel ka pekmi ram a cheu-khuaimi ram hna paoh cu bia ka ceih hna lai tiah Pathian nih a chim' tiah Robert Jeffress nih a fianter. 'Mah ruangah hin pei, Obama le Kerry nih Israel ralchanh in rian an tuanmi hi thin a phan i, tih a nun tuk cu' tiah fak ngaiin a chim.
Robert Jeffress nih a chim thanmi cu 'vanthat ngai a simi cu President thimmi Donald Trump kan ngei cang. Tuanbia tiluan a zul dingmi zong a si i, Pathian a zul dingmi zong a si. Israel le Palestinian nih ram an i cuhmi hi Pathiam nih a mipi a pekmi hna a si' tiah Genesis 12, 13 a fianter than.
'West Bank, Gaza, Golan Heights le a dangdang hna zong hi Pathian nih laksawng ah a miphun a pek cangmi hna an si dih. 'Zungzal in nan umnak ram a si lai tiah Pathian nih a kamh cangmi hna a si' tiah Robert Jeffress nih biahaltu pa sinah a chim.
Robert Jeffress nih a fianter thanmi cu 'Genesis 17 ah Pathian nih Abraham le a tefa hna sinah Jerusalem in nichuah lei zong a pek hna. Hi hmun hi Israel nih inn an sak cuahmah liomi zong a si i, naite ah UN nih an vote in an dohnak hna zong kha a si. Arab ram hna hi Pathian nih zinaan tam tuk in thlauchuahnak a pek hna' a ti.
"Pathian nih Abraham le Isaac le an tefa hna sinah a rak pek cangmi an si. Cucaah An i cuhmi ram le zinaan in a khatmi ram hna khi Israel sinah Pathian nih a pekmi hna an si. Israel ram an si i, zungzal in Israel ram an si peng ko lai' tiah Robert Jeffress nih a chim. RefL TCP.