Top Republican Upa Senators John McCain le Lindsey Graham cu Ukraine ah an tlawng. Ukraine dohnak ah Russia a rawk lai lai tiah Russian President Putin cu ralrinnak an pek. 2017 ah fak piin Russia dohnak a chuak lai an ti. Putin an huatnak kong fak ngaiin an chim.
2017 cu Russia doh kum a si lai i, Europe in nichuah lei kam ah Russia hi kan tei lai tiah bia an i kam. John McCain nih a chimmi cu 'Putin nih Ukraine hi a tei i, a lak khawh ahcun ramdang zong a lak chin lengmang hna lai' a ti. MaCain hi tuan deuh ah President zong aa cuh balmi a si i, Vietnam raltuk lio zong thong a rak tlami a si.
Senator Graham zong nih Ukraine a tlawnnak ah a chimmi cu 'nan ram caah fek tein nan dirmi kan thangthat tuk hna. Nan raldoh cu kan raldoh a si. 2017 cu raldoh kum a si lai. Washington ah kan kir than lai i, Russia ralchanh in Congress ah bia kan chim lai. Russia namneh hmanmi hi a za cang' tiah Ukraine ralkap cu thazaang a pek hna.
A chim thanmi cu 'atu cu Russia hi cawi-liam fak pi nih a kiah ve hna caan a si cang. Kan dohmi hna hi Russia mipi kan dohmi hna a si lo, Putin a si. Bia kan in kamhmi hna cu Washington ah nan kong kan chim lai. Nan ralthatnak hi American mipi sinah kan chim lai. Vawleicung theih in Putin kan dohnak kan chim lai' tiah a chim chih.
A peh thanmi cu 'nan tei lai tiah kan zumh. Nan tei hrimhrim lai. Nan teinak ding ah a herhmi paoh kan in bawmh hna lai. Thilri kan ngeih ruangah kan hlawhtlinmi a si lo, nan ralthat ruangah a si. Putin nih an tei hna ahcun hmun dangdang zong a tei hna lai. Putin hlawhtlinter kan duh lo' a ti.
Asinain President thimmi Donald Trump nih cun Putin a dirkamhnak a chim i, vawleicung caah rian kan tuan ti lai a ti. Ukraine khua Shyrokyne cu 2015 ah fak ngaiin an rak i kahnak khua a si i, a rawk ngaingai. Ukraine nih Russia in aa runvennak ah a biapi ngaimi khua a si. UN nih a report ning ahcun Ukraine le Russia kahnak minung 9,700 an thi a ti. Ref: The Express.