President thimmi Donald Trump nih Russian President Putin a thangthat lengmag. US thimnak a hack tu an si ti zong ah a zum kho rih lo. President Obama nih Russia dan a vun tat zong ah khan Putin nih lehrul lo tein a umpiakmi zong kha 'Putin hi a thluak tha bak a si' tiah Trump nih a thangthat.
Vawleicung ah Taluk le Russia nih United States nawlngeihnak (power) an zuamcawh cuahmah lioah, zeiruang ah dah Trump nih Russia cungah a nem i, Taluk cungah a hran khun? President office a tlaih hlan hmanh in Trump foreign policy muisam a vun lang ngaingai cang. Russia le Taluk cungah Trump dirhmun zeidah a si te lai?
Tuaktan thaim cheukhat nih an chimmi cu Trump nih foreign policy a zulh dingmi hi timh ciammam tein suaimi a si an ti lioah cheukhat nih cun caan sau pi chung US he aa pehtlaih cangmi an dirhmun Trump nih a theih khawh lo caah a si an ti. President Obama nih cun Taluk he hin kan i hlat chin lengmang sual lai tiah thatnak in kap hnih nih an i hrawm khawhmi lam a zulh pi hna.
Cu bantukin Obama nih Taluk a tlaih khawh tikah Russia nih international phung a buar caan ah dan a tat pi khawh tawn. Cucu Obama nih hlawhtlinnak a si. Asinain Trump nih a kal pimi hi theih a har ngai. Asia ah Taluk he buainak a ser i, Russia he hawi a ser ahcun Europe ram i US hawile (NATO) ram vialte he kal ti khawh lo ding dirhmun ah a phan dingmi a lo cang' tiah Foreign Relations kongah chungtel Steven Sestanovich nih a chim.
A chim thanmi cu 'Trump cawlcangh hi zoh tikah a duh ning paoh in midang a tuahto kho ding bantukin a um i, cawiliam kaa kiah lai lo tbk in a ruah' tiah a chim chih. Trump cawlcangh hi fak tuk in aa palh tikah cun fak tuk in aa su te lai i, cawiliam nih a kiah te ko lai tiah cheukhat nih an ruahmi a si.
Russia nih Crimea a lak i, Malaysia vanlawng zong a missile in an thlak. Syrian cozah zong a dirkamh i hriamnam thatha a pek. US riantuanmi vialte a rak doh dih. US thimnak zong a hack i, US democracy zong hi a thurhnawmh dih. Asinain Trump nih cun Putin he riantuan ti ding in timhnak a ngei i, dong loin Putin thangthatnak lawng te a chim.
Asinain Taluk cu Taiwan kongah buainak serpiak colh hna i, Taluk he chawlehthalnak kongah ral thawh ding in Trump nih a chim lengmang. Taluk nih kan rian (Jobs) vialte an kan firpiak dih cang a ti i, Taluk cungah Trump lungput hi Obama he cun aa lo ti lai lo ti hi fiang tein tuaktan thiam nih cun an hmuh cang. Ref: CNN.