Rev. Billy Graham nih a dawtmi a nupi Ruth he nu-va dirhmun in an tonmi hitihin a chim: Ruth le keimah zong a tlingmi nu-va kan si lo. Kan pahnih karlak ah chambaunak a um len ve ko; kan tling naisa ve lo, asinain kan i lunghmuih tuk thiamthiam a ti. Zeiruangah dah a si?
Rev. Billy Graham nih a chim thanmi cu 'kan tlin lonak, kan i dannak le kan i theihthiam tawn lonak nih kan i thitumnak le nu-va kan sinak a ngandamter khun' tiah a chim. Mrs. Ruth Bell Graham le Rev. Billy Graham hi kum 64 deng an um ti cang. Mi tampi nih cun a tlingmi nu-va le chungkhar ah a kan ruah ko lai, asinain kan tling naisai lo a ti.
Mrs. Ruth nih a chimmi cu 'zei kong paoh ah kan ruahnak le kan duhnak i khat lengmang seh law minung pakhat hi a herhnak a um hnga lo' a ti. Cucaah nu-va karlak ah theihthiam lonak le sukkhakhnak um pah zong hi -nu-va' kan sinak a biapinak cu a si ko a ti. Rev. Billy Graham nih a chimmi cu 'na nupi maw na pasal maw a tlamtlin lonak na cohlanpiak i, na theihthiam hnu cun pakhat le pakhat karlak ah theihthiam lonak a um thiam ti lo. Hihi nu-va teinak taktak cu a si a ti.
A chim thanmi cu 'nu-va nih pakhat le pakhat karlak ah chambau kan i theihpiak lo i, kan i cohlanpiak lo ahcun hmailei caah a har ngai ko. Pa nih a tlingmi nupi hmuh zong ruahchan ding a si lo; nu nih a tlingmi pasal hmuh zong ruahchan ding a si lo. Hmuh khawh zong a si lo. Hihi cu Pathian he naa pehtlaihnak nih lai a rel dingmi a si. Kan nih cun kan i thitum hlan hrimhrim in kan cawn cia cang' tiah Billy Graham nih a chim.
Minung kan sinak ah ahohmanh midang he kan i pehtlaihnak ah chambaunak a ngei lomi kan um lai lo. Kan ngei lo kan ti hmanh ah kaa khatkhat ahcun tlin lonak maw chambaunak maw a rak um hrimhrim ko lai. A tlingmi cu tuanbia lawng ah kan hmuh lai a ti.
Cucaah Billy Graham nih nu-va kip sinah ruahnak a kan pekmi cu Pathian lawnglawng hi nu-va nunnak laicer ah a um awk a si a ti. Nan nu-va karlak ah Pathian nawlngeihnak nan pek ahcun Pathian nih an bawmh hna lai i, aa nuammi nu-va le chungkhar nan si ko lai tiah Rev. Billy Graham nih a kan cawnpiak. Ref: Billy Graham.
Ngaihthiam Awk A Tha Lomi Sualnak: Billy Graham Bialehnak
----------------------------------------