April 2015 ah Italy, Mugnano khua ngaknu muidawh nu kum 31 nih minung panga sinah a sex video cu WhatsApp in a kuat hna. A kuatmi ah aa telmi pakhat cu a tlangval Sergio Di Palo a si, asinain an i pehtlaihnak a fekfuan bal lomi an si. A kuatmi video cu theih lomi minung hna he sex an tuahnak a si.
Zeiruangah dah a kuat hna timi ahohmah nih an thei lo. Thil a cangmi cu a video cu website kip le youtube kip ah an thlahpiak dih i, zarh khat hnuah cun vawleicung theih in a mualpho cang. An tuah lioah bia a chimmi cu 'video maw na tuah?' tiah a hawipa cu a ti. Cun a video zeihmi cu 'a tha tuk' tiah a chim chih. Online kip ah a mua a pho hnu cun a biachim cu caponak ah an hman cio.
Italian bawlung chuih thiam Paolo Cannavaro le Antonio Floro Flores zong nih capo in a biachimmi cu catlang te cu an lak i an video zeihnak ah an hman. Cantone nih video vialte thlakter than ding in aa zuam, asinain san a tlai ti lo. Biaceihnak zung ah a kal i, a chimmi cu 'keimah hnatlaknak tel loin website kip ah an tarmi a si' tiah a va ti.
Caan a kal deuh hnu cun a ningzah a celh ti lo. Leng chuah zong a duh ti lo. 'Ka chuah ahcun mipi nih an ka theih dih cang lai. Pasal ka ngeih tik le fa ka ngeih tik tiang zong ah ka video a tlau ti lai lo' a ti. Cuticun amah lawng nih a nunnak ral a doh lengmang. A nunnak re zong a thei chin lengmang cang. A nu nih a chimmi cu 'ka fanu hi mi tha tuk a si. A chuah kaa in a pa a hmu bal lo. Pa a ngeih lo tikah a nenno tuk' a ti.
Pa ngei loin a ummi nih a nunnak vialte hi a thawnter kho bal lo. Italian hlasak thiam hna hla a ngai tawn, novel tbk a rel tawn, cun piano a tum i, aa nuam ngaimi a si. Asinain online in a video an chuah hnu cun zeihmanh a tuah zuam ti lo. Kan mithmuh ah hin a nunnak a rawk thluahmah. Mi kip nih capo ah an seih' tiah a nu nih a mitthli he a chim.
Naples biaceihnak zung nih September ah $21,600 liamter in websites i a video vialte hlonhpiak ding in nawl an chuah; tam tuk an hlonhpiak khawh. Asinain amah le amah ah nuamhnak a ngei ti lo. September 13, 2016 ah a nu Maria Teresa Giglio cu riantuannak a kal. Tiziana lawng inn ah a um. Caan a rauh deuh in a riantuanak ah a nu cu Tiziana a ni nih phone a rak chawnh.
Aw nem tein inn ah rak tin a ka ti i, ka rak tin cu kan inn ah police le ambulance an rak um cang. Ka fiang colh ko. Ka tap colh. Ka inn pa nih ka motor chung zong in chuahter an ka duh lo. Mah hngal lo dengdeng in ka um lengmang. Ka inn chung zong ah luhter an ka sianh lo. A donghnak caan hmanh ah ka fanu ka hmu kho lo. A thih ni cu ka nunnak a donghnak a si ko' tiah a nu nih a chim.
Ni khat hnuah Maria Teresa Giglio nih a fanu ruak cu a vui. Maria Teresa Giglio nih a fanu video cu zeidah a si tiah a zoh ve. 'Biatak ka theih khawhnak ding ah tling tein zoh ka duh. Hihi Tiziana a si lo' tiah a zoh hnuah a chim. A chim thanmi cu 'hmun kip ah video a phak dihnak hi a cangsualmi a si lo. A hlankan tein khuakhangtu an rak um cang. Ka fanu mualphoter duh ah an tuah hramhrammi a si' a ti.
Tiziana Cantone thihnak tuanbia cu aa dawh lo nain a thongthong in a ram mi le vawleicung ram kip in tuarpinak an rak langhter cio. Cu chungah kum 15 chung a hawikawm a si cangmi Teresa Petrosino nih cun 'Tiziana Cantone cu aa dawh tuk, asinain fawi tuk in a nunnak a rawk. A hmaan lomi caan ah a hmaan lomi nung he aa tong sual' a ti. Ref: BBC.