Biahaltu: Jesuh Khrih hi Pathian Fapa a si ko ahcun zeiruangah dah a that deuhnak hmun siangpahrang inn ti bantuk ah chuah loin caw inn hna a chuah? Siangpahrang inn ti bantuk ah rak chuak seh law a rak tha deuh tuk lai lo maw?
Rev. Billy Graham: A si hrim ko, Jesuh Khrih cu siangpahrang a si taktak ko. Hmun tha deuh hna ah rak chuak seh law siangpahrang a si bantukin aa tlak tuk ko hnga. A ngaingai ti ahcun Bible nih 'Jesuh Khrih cu vawlei siangpahrang hna naak hmanh in a lianngan deuh tiah a kan chimh, zeicatiah Pathian Fapa, van le vawlei le a chungum vialte uktu a si.
Khuaruahhar awk um loin, a voikhatnak Christmas ah khan vancung mi hna kha tukhaal hna sinah an rak tum i, 'nan caah Khamhtu a chuah cang; Amah cu Messiah, Bawipa a si' tiah thawng an rak thanh hna (Luke 2:11). Asinain minung nih kan ruah khawh lo leng tiang in toi aa dor biknak hmun caw inn ah a chuak.
A chuah ah khan a nu Mary nih caw rawl einak kuang chungah a thlim. Pathian Fapa chuahnak ding ah hi naak in a niam deuhmi hmun dang na ruat kho ti lai maw? Zeiruangah dah Pathian nih a Fapa hi siangpahrang inn ah chuahter loin caw inn hna ah a chuahter? A ruang pahnih lakah pakhat cu miphun vialte khamh awk ah Pathian nih a rak thlah caah a si.
Aho kan si zong ah Jesuh Khrih nih a kan dawt dih. Sifak zong, mirum zong, minak zong, mirang zong, a der zong, a thawng zong etc, aa tluk tein Pathian nih a kan dawt caah a niam bikmi hmun ah a Fapa a run thlahnak a si. A vancung sunparnak vialte kal tak in vawlei mi hna sinah nautatnak lak in khua a sa ve. Citicun a dawtnak a kan hmuhsak.
Jesuh nih sifah hi zeidah a si timi a theih zeicatiah vawlei a um lioah a sifak tuk. Zei bantuk tukforhnak le harsatnak kan ton hmanh ah Jesuh nih a kan theih pi dih zeicatiah a ton dihmi lawng te an si. Cun a si fak tuk nain a chambau bal fawn lo. A zultu an rawltam tikah khim tein rawl a pek khawh hna i, ngunkhuai an rak kholh tikah Peter kha nga a tlaihter i, a kaa chung thil mansung kha a pekter hna Matt 17:27). .
Cucaah siangpahrang inn ah chuah loin nauta bik caw inn ah a chuahnak ruang pahnihnak cu toidornak hmuhsak a kan duh caah a si (Filipi 2:111). Na nunnak ah zeibantuk hmun dah Jesuh caah na chiahpiak ve? 'A rum tuk i, a caah chambaunak le harsatnak a um bal lomi cu a kal tak dih hna i, nangmah le keimah caah a sifak i, a chambau. A ruang cu nangmah le keimah rumter le duhdim nun pek a kan duh caah a si (2 Korin 8:9). Ref: Billy Graham.
A Nuammi Nu-Va Sinak Ding Ah A Biapi Tukmi: Billy Graham
---------------------------