Nationwide Ceasefire Agreement (NCA) ah min a thu cangmi Chin National Front (CNF) nih February 28 ah tuah dingmi a voihnihnak Panglong Conference ah tel lo ding in an hrocer hna. Cozah sinah CNF nih Chin State ah National-Level Political Dialogue ngei ding in an hal hna nain an sianh hna lo.
CNF nih an duh ning ah cun February 28 ah Nyapyitaw ah an tuah dingmi Panglong Conference hlanah hin CNF zong Chin State ah National-Level Political Dialogue ngei kho u sih ti an duh. Asinain cozah lei nih an onh hna lo tikah CNF cu kan lungtling lo ngai tiah CNF Vice President Dr. Lian Hmung Sakhong nih a chim.
An lungtlin lo lawng si loin 'a ra laimi Panglong Conference hmanh ah hin kan i tel lai maw tel lo timi kan ruah a hau lai' tiah Dr. Sakhong nih nikhatni ah a chim. Naypyitaw ah Union Peace Dialogue Joint Committee (UPDJC) tonnak an ngeih hnuah Dr. Sakhong nih a chimmi a si. UPDJC tonnak ah biachahnak an tuahmi cu February 28 hlanah Chin State or Rakhine State dialogue ngeih awk a tha lo an ti. Rakhine lei zong boycot ding in kan ruah lai an ti.
UPDJC hi cozah lei aiawhtu, Parliament aiawhtu, ralkap lei aiawhtu le poltical party lei aiawh le hriam tlaitu bu 8 aiawhtu vialte hna fonh in sermi a si. Lian Hmung Sakhong nih a chim thanmi cu 'kanmah (CNF) lei cun kan i ready ko nain Chin State cozah sinah Central Cozah leiin National-Level Political Dialogue kongah hnatlak pinak a ra lo a kan ti' tiah a chim.
President Office leiin biachimtu U Zaw Htay nih a chimmi cu 'Panglong Conference hlanah National-Level in Political Dialogue an tuah kho lai maw timi hi cu UPDJC cungah aa hngatmi a si a ti. Chin le Rakhine kongah cun security le politics ruangah lawng si loin February 28 hlanah an dih kho lai lo. Cucaah kan onh lonak hna ruang a si' a ti.
Lian Hmung Sakhong nih cun 'Cozah lei an chimmi hi a cohlang hna lo. National-level political dialogue tuah ding in ni kum October in kan i tim cang. Security kong ti ahcun kan ralkap le Kawl ralkap an i kap bal lo' tiah a chim chih. Kan mipi he kan i ruah hmasa lo cun zeidah Panglong Conference ah kan chuah pi lai. Kan mipi hna hmailei caah biakhiatu Conference a si lai caah kan caah cun a biapi tukmi a si. Cucaah kan caah cun national-level political dialoguw hi kan thihnak le kan nunnak tluk tein a biapimi a si' tiah a chim chih. Ref: Myanmartimes.