Nirukni ah Iran’s National Security and Foreign Policy Commission ah upa pakhat a simi Mojtaba Zonour nih a chimmi cu 'minute pasarih chungah kan missile nih Israel a phomh khawh lai a ti. A chim than rihmi cu 'US nih Iran a kan kah ahcun Israel zong kan phomh colh chih lai' a ti.
'Kan ral nih an i palh ahcun Israel rili kam hrawngah a ummi le US ralkap umnak kan phomh lai i, ciam cikcek in kan tuah colh hna lai. Israel kah khawhnak ding ah minutes pasarih te lawng kan herh' tiah hrocernak bia a chim. Nirukni ah Iran ralkap cu Iran in chaklei Semnan pengah eksaisai an ngei.
President Trump nih Iran missile hneksaknak ruangah dan a tat hna a thaizing ah ralkap eksaisai an tuah hi a si. US lehrulnak caah Iran aa hrocernak a si an ti. Iran ralkap lei upa Gen. Amir Ali Hajizadeh nih hrocernak bia a vun chim than. 'Iran cungah kan ral an i palh ahcun a tur in a turmi kan missile nih ruahsurh in a surh hna lai' a ti.
Gen. Amir Ali Hajizadeh nih a chim thanmi cu 'missile kan hneksak ruangah Washington nih dan a kan tatmi cu an kan huatnak langhternak caah a si ko. Kan ram runvennak caah a herh ning poah in kan i zuam chin lengmang lai. Kan ral nih an i palh ngam ko ahcun a hrum in a hrummi kan missile nih a tlak hna lai' tiah ralrin peknak bia a chim.
Tuan deuh zarhpini ah Iran nih missile an hneksak. US nih cun nuclear bom a phur khomi missile a si caah UN phung zong a buar an ti. Iran nih cun UN phung hrimhrim kan buar lo an ti ve. Israel PM Netanyahu zong UK le US a tlawng lai i, Iran kong hi fak piin ceih pi a timh hna. Ref: TOI.
Thil Pakhatkhat A Tlun Ahcun Biaceihtu Ruangah A Si Lai: Trump
--------------------------