America Inn sang pi pahnih an teih hnuin November 15, 2001 ah FBI nih vawleicung ah a sual bik tiah tlaih an duh bikmi minung cazin/Poster a chuah.
FBI, State Department le Department of Justice nih an seal in an namh chih. Tlaih an duhmi hna min 22 le an hmanthlak 22 an zong an chuah chih. A pakhatnak ah an tialmi min cu a tihnung cem tiah an ruahmi a si i, a tlai khomi paoh $5 million pek ding an si.
FBI, State Department le Department of Justice nih an seal in an namh chih. Tlaih an duhmi hna min 22 le an hmanthlak 22 an zong an chuah chih. A pakhatnak ah an tialmi min cu a tihnung cem tiah an ruahmi a si i, a tlai khomi paoh $5 million pek ding an si.
A min cu Imad Mughnijeh an ti i tapung vialte fonh in American mipi an thahmi hna naak in hi pa nih American a thahmi hna an tam deuh ti a si. April 18, 1983 ah Lebanon khuapi Beirut i American embassy an puah i 63 an thi; October 23,1983ah Beirut i U.S. Marine headquarter an puah than i 241 an thi; October 23, 1983 ah Beirut i French ralkap headquarter an puah than i 58 an thi.
Cun CIA Official William Buckley an lem i an thah; Kuwait ah American embassy voitam ngai an doh; TWA vanlawng an hijack i Kuwait vanlawng zong voihnih an hijack; Lebanon ah UN ralbawi W.R. Higgins an thah; cun Saudi Arabia ah American ralkap 20 an thah hna. Hi vialte thahnak ah khuakhangtu le riantuantu cu Imad Mughnijeh a si.
A cunglei cazin vialte cu Israel sungthoh Mossad sinah an phan dih; Mossad nih a tanglei ruang zongah kawl a duh fawn: November 4, 1983 ah Lebanon i Israel ralkap headquarter ah bom an puah i 60 an thi; March 1985 ah Lebanese le Israel ramri ah Israel ralkap motor an doh/teih i 8 an thi; March 17, 1992 ah Argentina i Israel embassy an puah than i 29 an thi; July 18, 1994 ah Argentina i Jews mi community center bom an puah than i 86 an thi.
Har Dov ah Israeli ralkap pathum an lem hna i an thah hna; Israeli businessman Elhanan Tannenbaum an lem i an thah, Israel le Lebanese ramri i Israeli ralkap Regev le Goldwasser an lem hna i an thah hna - A voihnihnak Lebenon Ral a chuah pinak zong a si. Mithla bang Middle East khuapi kip ah aa chawk-vakmi a si.
Ahohmanh hmanthlakter aa sianh hna lo; interview tuah zong a duh lo; a thlithup in a um zungzal. Nitlak sungthoh nih a cawlcanghnak vialte an theih dih ko nain aa thuhnak, a umtu ning le a muisam an thei kho lo. Lebanon khuate pakhat ah 1962 ah a chuakmi a si. A sianginn kai aa ngol i Palestinian Liberation Organization (PLO) tapung ah a lut.
A hnuah Yasser Arafat deputy Abu Ayad congtu ah a cang; a hnuah Ali Hassan Salameh (Red Prince) nih 1970 hrawng ah a dirhmi Special Security Unit 17 ah a lut. Asinain 1982 ah Israel nih ‘Operation Peace for Galilee’ tiin Lebanon cu a kah; PLO tapung cu a den dih hna. A tangmi hna kha Yasser Arafat nih a hruai hna i Tunisia ah an zam dih. Asinain Imad Mughnijeh tu cu a tang i Hezbollah bu ah aa fon. Hezbollah - Pathian Party- ti zong in auhmi an si i 1982 ah Israel lehrulnak caah dirhmi tapung bu an si ve.
Iranian supreme leader Ayatollah Khomeini nih a forhfial hna a forhfial hna i training an pek hna, cun an bawmh hna. Cuticun Israel ralhrang bik ah an cang i, Lebanon in Israel kan thawl dih hna lai i kan hloh beh hna lai tiah tinhmi an ngei. Mughnijeh hi thlithup tapung riantuan a thiam pinah sual khawh chung in a sualmi a si. 1983 ah hin kum 23 hrawng lawng a si rih.
American, French le Israeli ralkap fak piin a doh hna i a thah hrawng hna a si. Athens in Rome ah a rak zuangmi TWA vanlawng cu an hijack i Beirut airport ah a tumter. An zuan lioah Navy mongtu Dean Stethem a thah i vanlawng cung i a pum cu an rak hlonh. A rak zam than.
A pumpak nunnak kong hi an thei kho lo. Atunu a thit i fapa le fanu an ngeihmi dah ti lo cu a dang a konglam an thei kho lo. A sining a thuh peng. Libya ah plastic in a muisam aa thlen i a khahmul a sauter; a thau, mithmaan aa benh i a kormi lukhuh ngan pi aa chinh. FBI nih cun ‘Lebanon chuak a si; Arab holh a thiam, sam dum a si, khahmul a si, pe 5’8 saang a si i pond 120 a si’ an ti.
Tapung riantuan a thiam tuk tik le a ralthat tuk tikah Hezbollah nih an ‘hero’ ah an ruah i vawleicung sungthoh kip nih an tihmi ah a cang. Israel le CIA nih thah ding in an kawl lengmang. Beirut, Iran le Syria karlak ah aa chawh tikah aa ralring tuk; a congtu minung a tu leklek ti awk in a thlen lengmang hna; ahohmanh zungzal in a zum hna lo.
Israel sungthoh nih cun ‘minung pakua kemh tapung’ tiah an auh. Aman officer David Barkai nih British Sunday Times ah a chimmi cu ‘Imad Mughnijeh hi 1980 hrawng ah voi tam tuk thah kan timh cang. A konglam kan hlat thluahmah i kan theih deuh cang kan ti tik paoh ah kan rak hlaat chin lengmang — a thazaang dernak kan hmu kho lo; nu a duh lo, tangka a duh lo, drug a duh lo - zeihmanh in lem khawh le terh khawh dingmi minung a si lo’ a ti.
Kum zeimawzat chung an kawl. 1988 ah French nawlngeihtu nih an rak tlaih dengmang. Paris ah aa citmi vanlawng a rak tum i CIA nih French nawlngeitu cu an chimh hna. A hmaanthlak zong an pek hna pinah a deumi passport a hmanmi tiang in an pek hna. Asinain kan tlaih ahcun Lebanon ah tapung nih French an tlaihmi hna an thah sual hna lai tiah an rak i theihter lo; cuticun Israel le CIA nih thideng in an kawlmi cu an bel chung in an chuahter than. 1986 ah Europe a tlawn lioah an tlaih manh dengmang nain a tlau manh; Saudi Arabia ah 1995 ah an tlaih manh dengmang than asinain a tlau manh lengmang.
Hi kum hrawng cu Israel zong biatak tein an rak doh hna. Argentina i Israel embassy an rak puah i 29 an thi. Lebanon ah Hezbollah hruaitu Sheikh Abbas Al-Musawi kan thahmi a kan lehrulnak a si tiah Mossad hruaitu upa nih cun an ruah. Kum hnih hnuah Agentina thiamthiam ah Jewish community center an puah than i 86 an rak thi. Lebanon i Hezbollah hruaitu pakhat Mustafa Dirani kan soilem ruangah a si lai tiah Mossad hruaitu upa nih cun a ruah than.
CIA le Mossad nih tha tein bom an puah ning an hlat tikah Imad Mughnijeh kut neh a si an ti. Israel a dohmi hna cu amah tein thihdan i pek bantuk a si. December 1994 ah Mughnijeh cu Beirut ah an hmuh; Lebanese police nih a rannak in an phuan colh. Muslim tlangbawi Sheikh Fahlallah nih a sermon tawnnak muslim pumhnak pawng i motor tangah bom an chiah. Mughnijeh a rat in buah ding in timh cia tein an hnhak ko.
Mughnijeh a ra cang tiah bom cu a puah i Mughnijeh upa Fuad Mughnijeh tu a thi; asinain Mughnijeh cu a luat. A rak thi ve ding a si ko nain pumhnak a rat hlan deuh ah aa let than i a rak ra lo; a dang minung pakua cu an thi chih. A zarh tlawmpal ah Lebanese sungthoh le Hezbollah fonh i a puahtu cu an kawl. An lunghrinhmi hna paoh an tlaih hna. Cu lakah an lunghrinh bik cu Ahmed Halek a si. Police official nih an chimmi cu ‘Fuad Mughnijeh dawr pawng ah Halek le a nupi nih an motor an chiah' timi an theih.
Halek zong Fuad pawngah cun a kal i Fuad a um maw um lo tiah a va zoh i a kut zong a tlaih; cun a motor ah a kir than, cun a puak cang’ an ti. Lebenese media As-Safir nih cun ‘Halek nih Cyprus ah Mossad officer a ton hna i bompuah ning le a hman ning an chimh; $100,000 zong an pek’ a ti. Haklek cu an tlaih i, thah colh. Mossad nih an agent in an hmanmi a rak si. Mossad nih ngol an tim lo. Mossad nih thawngpang an theih thanmi cu Mughnijeh nih a muisam aa thlen than timi an theih. Mossad nih Lebanese minung zeimawzat an hmanmi hna an um i, Mughnijeh chuahnak khua ah chungkhar a ngeimi pakhat a um.
Part - II Peh Than Ding!