President Trump nih ramrunvennak caah $54 billion kan karhter chap lai a ti. American tuanbia i ram runvennak caah an hman dingmi tangka an karhter a tam bik a si lai tiah Trump nih cun a chim. A tanglei ah US ralkap le hriamnam thazaang kan vun langhter.
US ram runvennak caah a hmanmi
A luan cia US President dangdang zong nih an ralkap caah hman ding tangka an rak karhter ko hna. Jimmy Carter nih Persian Gulf ah a ralkap a rak thlah hna i an rak karhter. Ronald Reagan zong Soviet Union he hriamnam ser an rak i zuam i a rak karhter; George W. Bush zong Iraq le Afghanistan ah ral a rak doh i a rak karhter.
Ralkap caah ram kip nih an hmanmi tangka zat
Trump zong karhter ding in timhnak a ngei, asinain zeidah tuah a duh i karhter a timhnak a si timi theih a si rih lo. National Security ruahnak petu Erin M. Simpson nih cun 'timhtuahnak ngeih caah karhternak' tiah a auhpiak.
US ralkap zat
Vawleicung ram vialte hna naak in US nih a ralkap caah a hmanmi hi a tam bik. Ramdang policy a ngeihmi ruangah an si. A ram a runven, ram kip ah daihnak umter a duh, ram kip ah American miaknak khua a khang zungzal.
'Europe, Middle East, Asia-Pacific ah a thawng bik si peng kan duh. Hi ram hna dirhmun rup in kan ralkap thazaang zong kan thawnter i, kan lianhter' tiah Washington i Center for Strategic and International Studies ah Defense Budget Analysis director a simi Todd Harrison nih a chim.
US Ralkap
US nih ralkap rian taktak a tlai i, ramchung le ramleng ah a cawlcangmi (active-duty troops) 1.3 million a ngei i, aa chiahmi hi 865,000 an si. Vawleicung ram ah a ngan bikmi ralkap a ngeimi pakhat ah aa tel.
US ralkap zat
Ramdang bantuk si loin ramdang ah a ralkap a chiahmi an tam tuk. Vawleicung ram 170 ah a ralkap a chiahmi hna hi 200,000 hrawng an si.
Ram kip ah US nih a ralkap a chiahmi zat le ram hna
Raltuknak Vanlawng Thazaang
US nih raltuknak vanlawng a ngeihmi hi 2,200 hrawng an si. Air Force nih an hmanmi hi 1,400 a si i, Trump nih cun a tlawm bik ah 100 in kan chap lai a ti.
US raltuknak vanlawng thazaang
Raltuknak Tilanwg Thazaang
US nih raltuknak tilawng 275 an ngei i, Trump nih 350 ka chap lai a ti. A chapmi chungah raltuknak vanlawng phurtu tilawng lian pahnih aa tel lai. Raltuknak vanlawng phurtu tilanwg 18 an ngei cang. Vawleicung ah ti leiah a thawng bik ram an si.
US raltuknak tilawng thazaang
A tang hmanthlak pawl hi zong aa tel chihmi an si.
US raltuknak tilawng thazaang thiamthiam an si
Nuclear Hriamnam
Trump nih nuclear thazaang zong chap chin lengmang ding in timhnak a ngei. Hriamnam zuamnak zong a herh cun chuahter ko seh. Zei zong vialte in kan lonh dih hna lai tiah Trump bia an hal lioah a chim.
Nuclear thazaang
US le Russia hi nuclear hriamnam a ngei cem an si. Asinain nuclear hriamnam karhter lo ding tiah hnatlaknak an rak tuah hnu cun an hriamnam a zorter ngaingai cang. Russia nuclear hi 7,300 hrawng a si i, US 6,970 hrawng a si. Ref: NYT.