US Senator John McCain nih North Korea hruaitu Kim Jong-un cu 'hngakchia molh-thau te (crazy fat kid) tiah a auh ruangah North Korea hruaitu le a upa pawl an thinhung kho tuk. US he ral kan tho lai an ti cang.
North Korea hruaitu upa an thinhun tuknak ruang cu naite ah North Korea missile hneksaknak kongah Senator McCain cu biahalnak an tuah i, a chimmi cu 'dongh hngal loin US hrawh ding in a au lengmang. Hi 'hngakchia molh - thau te' hi missile zong a hneksak lengmang' tiah McCain nih a chim.
A chim thanmi cu 'hi hngakchia molh-thau te hi Taluk lawng nih an cawnpiak khawh lai. North Korea zong uk kho loin a tuah khotu le an economic zong a donghter khotu cu Taluk an si. Asinain Taluk nih zeihmanh an tuah lo tikah kanmah nih dan kan tat a hau.
A chak an rengh lo ahcun ral a thawhter khotu zong a si' tiah a chimh. North Korea leiin an vun leh colh ve. 'Kan hruaitu sangbik thangchiatnak an chimmi hi North Korea kan zumhnak le kan dir pimi phung an huatnak le a kan dohnak a langhtertu a si.
Kan mipi ralchanh le doh zong a si. Hi bantukin kan hruaitu Kim Jong-un thangchiatnak an chimmi cu ral kan tho lai ti he aa khat' tiah fak ngaiin State media nih an vun phomh ve hna. A chim thanmi cu 'John McCain le Ted Cruz nih North Korea huatnak le ralchanhnak bia an chim.
Hi bantuk bia an chimmi hi ral kan tho lai ti he aa khat. North Korea zong nih dohnak ding karhlei kan lam ve lai' tiah fak ngaiin an vun i hrocer cang. Cun report nih a tial ning ahcun Taluk zong nih 'pa thau te' tiah Kim Jong-un hi an auh lengmang.
Asinain North Korea nih 'kan sunhlawih tukmi kan hruaitu Kim hi 'pa thau te' tiah kan auhpiak hlah u tiah an nawl hna' a ti. Cun North Korea scientist nih 'thau zorternak lam kan theih cang' an ti. Asinain Kim hi zeiruangah dah a thau a zor hlei lo. Aa zorter duh lo maw a si? An zorter khawh lo dah a si timi theih a si rih lo. Ref: The sun.