Hmai zarh hrawng in cun Israel ralkap nih an pa David chai missile runvennak an hman cang lai. Nikhatni ah Israel ralkap lei upa nih an chimmi cu 'David Sling Anti-Missile' a nung cang lai an ti. Israel nih an ram runvennak missiel an ngeihmi lakah a tha cem pakhat a si ve.
A min ah David Sling tiah an auh. David nih Goliath a rak thahnak chai min lak in an ram runvennak missile min ah an hman. Israel nih ram runvennak an ngeihmi ah 'Arrow' hi a tha taktakmi a si. Nuclear le missile lianlian in kan kap sual hna seh law kan i runvennak a si lai an timi ruvennak system lian taktak a si.
Cun David Chai zong hi a tha taktakmi a si. Nai hrawng cu Syria he an i hrocer lengmang tikah biatak tein an ram runvennak thazaang an pek cang. Syria le Iran nih hriamnam thatha an pekmi lengmang Hezbollah tapung zong an cawlcang chin lengmang cang. Iran zong Syria ah cawlcangh aa timh chin lengmang cang. Mah ram pawl hi Israel hloh ding in khua a khaang pengmi an si.
Israel ram runvennak kongah tuanvo ngeitu Brig. Gen. Tzvika Haimovitch nih a chimmi cu 'kan ram runvennak thazaang kan pek chin lengmang a hau cang. David Chai (David Sling) zong hmai zarh lei cun kan nunter cang lai. A ni le caan cu kan chim kho lo' a ti. A chim thanmi cu 'David chai kan hman chih hmanh ah Israel hi kan him hlei lo' a ti.
David Sling nih thil ti khawhnak tampi a kan pek thiamthiam. Asinain David Sling lawng hi a za lo a ti. Israel nih Iron Dome System a ngei rih. Rocket pawl cu a kham lengmang hna. Lamhla a kak kho lomi rocket runvennak system a si. Gaza le Lebanon tbk in tapung nih an rak kah hna tikah an i runvennak a si.
Syria kut in Hezbollah tapung sinah a phan cangmi missile pawl hi meng 40 in 190 karlak a kah kho cangmi an si tiah US nih cun a chim. Cucaah Irone Dome nih cun a kham kho ti lo. David Sling lawng nih a kham cang lai an ti. Syria le Hezbollah nih rocket le missile sangsang an hman chin lengmang cang lai tiah Israel zong an lungrethei pah cang. Ref: TOI.