Nilini zan, zing lei suimilam 2 hrawngah Israel raltuknak vanlawng pali cu Syrian ramchung ah an va zuang i, Syrian ramchung hmun zeimawzat an va phomh hna. Arab media nih a chim ning ahcun Syria nih Hezbollah tapung sinah an pekmi hriamnam hmun an phomh' tiah a chim.
Syrian lei ralkap upa zong nih 'Israeli raltuknak vanlawng pali nih Palmyra pawng an rak phomh cikcek' tiah an chim. A chim chihmi cu 'kan ram runvennak missile in kan kah hna i, Israel vanlawng pakhat kan thlak; a dang pakhat zong kan khen chih. A dang cu an zam dih manh' tiah an chim.
Asinain Israel lei IAF upa nih cun 'a hmaan lo. Kan mipi zong an him, kan ralkap zong an him ko' tiah ningani zing fianternak an vun tuah. Thla ruk chungah Syrian ralkap nih an missile hriamnam lian an hman a voihnihnak a si cang. Tuan deuh zong ah Israel raltuknak vanlawng nih Syrian ramchungah Hezbollah ralhrang an rak phomh hna i pali an thah hna.
Hezbollah hi Iran an siah Syrian an siah an bawmh lengmangmi hna an si. Hriamnam thatha an pek hna. Israel an dohter lengmang hna. Mah ruangah Israel nih fak taktak in hmun kip ah an phomh lengmang ve hna. Israel nih Syrian an phomh hna kip ah lenglang in chim an duh bal lo, asinain tutan ah cun kan kah ko hna tiah an chim.
An rak kahnak missile pakhat cu Israel ramrunvennak 'Arrow' timi a kah i, a thlak. Mipi an khuaruahhar ngaimi cu zeiruangah dah Israel ralkap nih 'Arrow' an hman tiah biahalnak tampi an tuah. 'Arrow' cu hriamnam lianlian kahnak le runvennak caah hman ding timi a si.
Syrian missile kahnak ah an hmanmi hi an i ruah palh caah maw a si hnga an ti. Syrian nih an rak kahnak hna hi SA-5 surface-to-air missile (SAMs) a si an ti. Syrian President Assd ralkap nih an rak kah hna i Jordan in Jerusalem lei tiang an rak phan. Pakhat cu 'Arrow' nih a thlak i, a dang cu hmun dang ah an thlah hna. Mipi lakah an tla lo.
Ningani zing i Syrian ralkap nih an hmanmi SAMs nih Israel ralkap an thin a phanter ngai hna an ti; an thinphan chinchin rihmi cu Lebanon le Syria ramchung ah Iran nih Iran rocket sernak inn a sakmi hi a si an ti. Expert nih an chimmi cu Israel nih Hezbollah raltho le an hriamnam a phomh lengmangmi hi Syrian cozah nih a cohlang kho ti lo an ti.
Kum dang ahcun Israel nih Syrian chung a kah tikah Syrian nih an rak let bal hna lo, asinain ni kum le tu kum hnu cun a missile in an vun kah lengmang cang hna. Israel caah ruah awktlak ngai thil a si cang tiah expert nih an chim chih. A hleiin Iran nih Lebanon le Syria ah rocket inn a sermi hi missile chuah kho tiang dirhmun ah a um tiah Kuwaiti Newspaper al-Jarida nih a tial.
Iran nih kum 50 chung Syrian tilawng hmun ka hlan lai a ti fawn. Syria ah Iran cawlcangh ngai aa tim cang. Naite i Russia President Putin he an i ton lio zong ah PM Netanyahu nih a chimmi cu 'Syria i tapung hmun hi Iran nih rolh a timh cang' a ti. Ref: TOI.