Missile a hneksaknak a siah nuclear in hrocernak a hmannak a siah North Korea nih President Trump hnabei an donghter ngai ko cang. Naite ah Trump nih N. Korea kongah zeitin dah policy kan ser than khawh lai timi a zohter cang hna.
US le North Korea karlak huatnak hi a linsa zungzalmi a si. Atu zong US a kap kho dingmi intercontinental ballistic missile (ICBM) a ser cuahmah lio a si. N. Korea hruaitu Kim Jong-un nih ICBM kan hneksak deng cang tiah ni kum a dongh leiah a phuan.
Asinain January ah President Trump nih 'kan serter hna lai lo' a rak ti. US cozah nih an chimmi cu N. Korea kongah zei zong te hi cabuai cungah a um dih ko cang. A herh ahcun ralkap zong in kan kah cang ko hna lai an rak ti. An nuclear le missile hmun kahpiak ding zong in an rak ruah.
North Korea nuclear le missile hmun hi a tam ngai tikah kan thei thlu kho hnga maw ti zong an phang fawn. Cun Taluk nih a bawmh lai tiah expert nih cun an zumh fawn. Cun a dang an thinphan thanmi cu North Korea hi kan kah i a nuclear le missile hriamnam kan hrawh dih hmanh ah South Korea le Japan cungah tihnung sivai (chemical) hriamnam a hman lai an ti.
Sivai hriamnam a hman ahcun Japan le South Korea ah million in minung an thi khomi a si ti zong an zumh. Cucaah Trump nih North Korea cungah zeitin dah rian kan tuan lai timi a zohtermi hna ahhin ralkap lei cun a har deuh ko an ti. Ralkap kan hman ahcun sipuaizi harsatnak fak piin a chuahter than lai ti zong an zumh.
A donghnak ahcun sipuaizing in kan phih than ah a tha ko lai timi lam ah an phan. Nuclear le missile ser kho lo ding in sipuaizi kan phih ahhin a rem bik an ti. Nun maw nan duh deuh nuclear dah nan duh deuh tiin an herhmi thimternak ding ah cun sipuaizi phihnak lawng lam a um ti a si.
Asinain cheukha nih cun 'N. Korea nih cu bantuk tiang ruahnak an ngei lai lo' an ti. UN dantatnak hi cu zeihmanh ah a rel lo. Cucaah fak deuh in dan a tat than ko lai tiah zumh a si. Ref: VOA News.