President Trump nih Suprem Court caah a thimmi Neil Gorsuch cu nikhatni ah khan Congress i Senate upa hna hmaiah biahalnak an tuah cang. Republican upa nih cun fehter a si ko lai tiah an zumh, asinain Democrats upa leiin khamnak khua lawng te an khang.
'Biahalnak le bialehnak kan tuahnak ah Neil Gorsuch thil ti a tha tuk. Neil Gorsuch ralchanh in bia a chimmi le vote a thlami cu an ningzak lai. Bia a kan lehmi an tha tuk' tiah Senate Judiciary Committee chairman Republican Chuck Grassley nih a chim. A biachim an zoh tikah conservative lam a zulhnak fiang tein a lang.
Neil Gorsuch hi President thing Bush nih 2006 ah Federal biaceihtu ah a rak thimmi a si. Ni kum ah Supreme Court biaceihtu Antonin Scalia a thih in President Trump nih Scalia hmun ah thut ding in a thimmi a si. A hmuh ning hi Conservative ngai a si an ti i, Khrihfami hna nih cun an uar ngaimi a si. Amah hrimhrim hi mifim, thil ti kho le a ruahnak a kau ngaimi a si.
Senate ah Democrats hruaitu Chuck Schumer nih a chimmi cu 'Neil Gorsuch hi a theihhngalhnak zong a kau ko lai, cun dingfel tein biaceihnak aa tlaihmi zong a si ko lai, asinain a tuanbia zoh tikah tanhhleimi a ngei ko lai' tiah a chim. California University professor Rick Hasen nih a chimmi cu 'Neil Gorsuch hi Justice Kennedy he an i khat te lai, asinain conservative Scalia bantukin vote a thla te lai' tiah a chim.
Senate ah hin Democrats 48 an si i, Republican hi 52 an si. Republican lei nih cun an uar dih. An dawng tein an vote dih lai tiah zumh a si. Asinain Democrats lei nih cun an doh taktak. President thing Obama nih Merrick Garland a rak thim i, Republican nih an rak thahpiak. Tutan zong Democrats nih kan thah ve lai tiah an i zuam, asinain an that kho lai lo an ti.
Nikhatni ah a hmuh ning le a zumh ning an chimter i, phunghram hi ka upat lai i, phunghram ning in rian ka tuan lai a ti. Congress chungah upadi sertu hna hi upadi ning in riantuan loin anmah duh ning in rian an tuan ahcun 'mipi cozah le mipi caah cozah' kan timi hi a leirawl cang. Congress cu mipi aiawhtu kan si bantukin mipi caah rian kan tuah awk a si i, mipi nih kan cozah hi kan hruai awk a si a ti. Ref: VOA News.