Thlacam ti ding in a Khrihfabu chungtel pakhat cu Pastor Herbert Valero nih a va len i, a hngawng ah namte in a rak sawh i a thi tiah police nih an chim. Namte in a sawh hi zan 8:00 p.m hrawngah a si i, a chungkhar sinah 'thla ka va campi ta lai' tiah a chimh hna.
Asinain namte in a sawh khawh in a hngawng cu a kut in aa phih pah in motor in a rak zam. Inn a phak in namte in a ka sawh tiah a chungkhar a chimh hna. A chungkhar nih a rannak in police an chawnh hna i an rak phan colh. A hma a fah caah sizung kal pi ding in an timh cuahmah lioah bia zong hal manh loin a nunnak a liam.
Zeiruangah dah a sawh timi zong an thei rih lo. Namte in a sawh lioah hin anmah lawng an um ti an ti.California khua pakhat Salinas i Victory Outreach Church ah Pastor a tuanmi a si i, namte in a sawhtu Servando Ayala Silva 37, hi a Khrihfabu chungtel a si. Thong ah an thlak cang.
Victory Outreach pastor David Dell Castro nih a chimmi cu 'zahan zan thil cang nih kan khuaruah a kan harter tuk. Kan khua hrawnghrang ah thlennak ngan pi a kan serpiaktu zong a si i, misual, umnak ngei lo le lamkam a vakvai tbk zawn a ruat i, hmun kip ah thawngtha a vah pimi a si' a ti.
A Khrihfabu chungtel pakhat nih twitter in a tialmi cu 'Pastor Herb hi ka theihmi chungah cun a zumhnak a thawng cem pakhat a si. Kan khua Salinas caah rian tam tuk a kan tuanpiak. Mi kip a bawmh hna. Ka Pastor a simi cungah kaa lawm tuk' a ti. TCP.