Ningani zinglei ah US nih Syrian Airbase cu nak cikcek in a phomhpiak hna. Vawleicung ram kip in an au le zai an vun thlah cio hna. A zaimi tampi lakah a rak i lawmmi tampi an rak um hna. Aho hna dah Trump hawi an si i, aho hna dah Syria hawi an si?
Russia: Russian President Vladimir Putin nih cun 'US nih international phunglam an buar. Syria a kahmi cu a hran hnawh tuk. Tapung dohnak kongah Russia le US ralkap hnatlaknak tuahmi kan ngol lai tiah an vun i hrocer colh. Zeitluk in dah Syria an dirpi timi a lang.
Saudia Arabia: Syria an kahmi cungah an lung a rak tling. President Trump biachahnak hi upat tlak a si. Syria cozah nih a mipi cungah sualnak a tuahmi hi lehrul phu a si. UN nih zeihmanh a tuah lo i Trump nih a tuah an ti. Syrian President Assad thlak a duhmi an si ve.
Jordan: President Trump nih biachahnak a tuahmi hi a herhmi zong a si i, a caan te ah a cawlcang an ti i an thangthat ngaingai. Syrian ralkap nih sivaidat hriamnam an hmanmi kongah thinhunnak fak piin an langhter. US he ISIS a domi zong a si i, refugee zong a cohlangmi ram a si.
Turkey: Assad cozah sualnak hi fak piin lehrul phu a si. President Trump nih a kahmi cungah kan dirkamh an ti. Syria Airbase an phomhpiakmi nih Syria dantat a phutnak fiang tein a langhter i, hmailei zong ah mipi cungah hi bantuk hriamnam hman khawh a si lo timi fiang tein a langhter an ti. Assad thlak a duhmi an si ve.
Iran: Fak piin Iran nih cun President Trump biachahnak sual an phawt. Syria Airbase an kahmi kongah fak piin kan duh lonak kan langhter. Tapung thazaang thawntertu a si lai. Pawngkam ram hrawnghrang buainak zualter chintu a si lai an ti. Syria hi Sunni Muslim nih an uk sual lai ti an phan tukmi a si. Mah ruangah Assad cozah (Shia Muslim) an dirkamh peng.
Taluk: US he ralchanh in a kal peng i, Russia unau bantuk a simi Taluk zong nih an lungtlin lonak an langhter. Vawlcung ram kongah ralkap thazaang hman kan cohlang lo; cun Syria nih sivaidat an hmanmi zong kan cohlang lo an ti.
Daihnak in remnak ser hi kan duhmi a si tiah Taluk Foreign Minister nih a chim. Tibet le human rights kong a thangchia taktakmi a si ve. Asinain a biachim tu a patling ngaingai.
Australia: US nih khulrang taktak in sivaidat hman kongah an lehrulmi cungah kan lungtling i kan dirkamh an ti. Mipi cungah sualnak a tuahmi cozah a si. An Airbase kahnak nih Assad cozah tampi a cawnpiak hna lai an ti.
Israel: President Trump nih a bia le a tuahsernak in a thawng tukmi cawlcanghnak a langhter. Kan dirkamh ve. Mipi cungah sivaidat aa telmi hriamnam hman hi kan cohlang kho lo tiah PM Netanyahu nih a chim.
Japan, Uk, Spain, Italy, Germany le NATO hna zong an tlungtling tuk. A hmun le a caan bak teah President Trump nih bia a chim i a cawnpiak an ti. Ref: CNN.