Al-Qaida tapung nih US an vun hrocer ning a fak ngaingai. Muslim nan kan hremnak, nan kan namnehnak le nan kan thahnak vialte lehrul kan in cham cang hna lai tiah an hruaitu Ayman al-Zawahri nih video in thawngthanhnak a tuah.
Social media ah video in an vun thlahmi ah a chim thanmi cu 'American mipi sinah bia kan chimmi hi a fiang tuk. September 11, 2001 i nan inn sang pipi pahnih kan denmi kha nan sual ruangah a si. Palestine ah sualnak nan tuah, Afghanistan ah sualnak nan tuah, Iraq, Levant le Mali le ram dangdang ah nan tuah hna.
Kha lioah kan rak in dohmi hna kha Muslim kan inn cia ah nan kan hremnak le thahnak le nan kan hramhnak ruangah an si. September 11 naak in fak deuh in kan doh rih hna lai. Nan sual chung paoh cu Pathian nih a rem ti ahcun 9/11 hi kan nolh lengmang a ti. Voi zakhat tiang zong kan nolh lai a ti.
US inn sang pi pahnih a rak chimtu kha Al-Qaida hruaitu Osama Bin Laden khuakhannak a si an ti. Kha lioah American minung 3,000 hrawng an rak thi. US tuanbia ah tapung dohnak fak cem an ton a si. 2011 ah Osama Bin Laden cu Pakistan ah US Navy Seals pawl nih an va kah.
Bin Laden a thih hnuah Al-Zawahri nih hruaitu sinak a tlaih. Tutan US a hrocernak biachim cu a fak ngai cang an ti. Ref: The sun.