North Korea state media Yonhap news agency nih US ralkap hrocernak vialte cu fak ngaiin an vun phomh than hna. 'Kan rili i nan hawile Japan le South Korea he nan raltuknak tilawng le ralkap hrocernak le eksaisai tuahnak nih kan thin an kan phanter naisai lo' tiah an vun ti than hna.
Syria a kah khawh cun a raltuknak vanlawng phurtu tilawng le nuclear phurtu tilawng tiang in Korea rili leiah a rak rat hnawh. US nih hi tluk luammam in ramdang ah a thazaang dih-umnak he a kal bal lo. Cun Japan le South Korea ralkap he puai ngan taktak in eksaisai an tuah.
A ngaingai ti ahcun North Korea hrocernak le ramdang hrocernak hna an si. An kaa in kan i hrocernak hna an si tiah an chim lo lawng khi a si. Asinain North Korea nih zeihmanh ah a rel hna lo. North Korea hruaitu Kim Jong-un hi a rak khohcho hrimhrim ko.
Nirukni zingka ah a missile a hneksak than. A tlolh diam! Zeitin dah an ramchung media nih ca an tial than ti ahcun 'nan kan hrocernak le thazaang phorzar hnawhnak hi North Korea cungah zeihmanh santlai lo a si. US nih philh u' an ti hna.
An tial thanmi cu 'nihchuak nan si. Manh lo ngaiin kan nuclear hmaika ah nan nuclear phurtu cu nan rak rat pi. Asia nichuah ram ah nuclear mit kan ngeih hi philh hlah u' tiah fak ngaiin an phomh than hna. Atu zong Kim Jong-un nih a chim tiah an reportmi cu 'a missile a tlolh than hnu cun zarh fatin in ka hneksak cang lai' a ti.
US nih cun a kan thihpheih kho lai lo. An nuclear phurtu tilawng menmen nih a kan lauter lai lo. North Korea kan lungput le khohchonak hi a derthawmmi US nih cun a kan hnin kho naisai lai lo' a ti. Ref: The Express.