Thla kua chungah vawleicung media lian cem ah aa telmi Fox News company founder le an bochan tukmi pakhat chuah an tong. July 6, 2016 ah Fox News CEO Roger Ailes nih a ka tuaitam tiah Gretchen Carlson nih taza a cuai. Zarh hnih hnuah Ailes cu an thawl.
Nithumni ah Bill O'Reilly nih Ailes keneh a vun zulh than. Fox News thang a chia ngaingai. Media ram vialte a hninh dih cikcek an ti. Tuanbia aa thok ning cu: Gretchen Carlson nih a chimmi cu Roger nih sualpi a ka timh i ka duh lo ruangah rian in a ka phuah a ti.
Asinain Ailes nih a chimmi cu 'Fox News ah riantuan ding in hnatlaknak kan tuahmi caan a dih cang i kan thar chuah ti lo caah lehrul chamnak a tuahmi a si' a ti. Fox News ah bochan ngaimi Megyn Kelly nih a chimmi cu 'Ailes nih sual pi a timh ko tiah a phuan.
Fox News ah riantuantu thing Laurie Luhn nih a phuan vemi cu kum 20 chung Roger Ailes nih a ka tuaitam. Fox news nih an theih dihmi a si tiah New York Magazine ah a chim. 'Lungthin le ruahnak hrem tluk in ka tuar' tiah a chim.
Andrea Tantaros zong nih a chimmi cu Ailes le O'Reilly nih an ka tuaitam lengmang tiah a chim. Tazacuainak ah a chimmi cu 'Fox News hi conservative phung a rungvengtu an si nain a chung cun sex tiluannak le dawhcah lo nunnak hmun bantuk a si' a ti.
Wendy Walsh zong nih a chimmi cu O'Reilly nih sual pi a ka timh lengmang a ti. O'Reilly nih sual pi a timhmi an tam ngai. Fox News nih an chimmi cu 'tha tein hlathlainak kan tuah dih hnuah hnatlaknak kan tuahmi cu 'Fox News ah O'Reilly cu a ra ti lai lo' an ti.
O'Reilly nih a chimmi cu 'Fox News in ka chuahmi cu lungfak ngai a si ko. Sual a ka puhtu nih an chimmi hi hram ngei lo lawng te an si' a ti. Fox News company cu thangchiatnak nih dong loin a rak zelh hna.
Cuticun kum 20 chung Fox News a hruaimi cu Roger Ailes nih a chuah tak diam hna i, an bochan tukmi O'Reilly zong nih a chuah tak hna. Thla kua chungah bochanmi pahnih dawhcah loin an tlu diam. Fox News ah Rupert Murdoch cu Chairman le CEO a si cang. Ref: CNN News.