US Top ralbawi Admiral Harry Harris nih cun 'North Korea nih hin US a kap khomi nuclear hriamnam a ngeih te ko lai' tiah US Congress upa hna sinah nihin ah a chim. 'Nuclear hriamnam a ngeih hnuah ahcun thil sual zong a tuah te lai. Ahohmanh nih kan thei lo' a ti.
President Trump nih Inn Raan ah Senate upa vialte tonnak a ngeih hna hnuah Admiral Harry Harris nih a chimmi a si. A chim thanmi cu 'North Korea hi kan kham khawh lo ahcun US kap khomi nulcear a ngei te lai. Thomas Edison zong 1,000 aa palh hnu lawng mei bulh a ser khawh.
Kim Jong-un zong nuclear a ngeih khawh hlan lo cu aa um sawhsawh lai lo. A rauh hlanah a hlawhtling hrimhrim te lai' tiah a chim. 'US nih kan thei lo. Zeitik ah dah North Korea nih nuclear hlawhtlinnak a hmuh lai? Ahohmanh nih kan chim kho lo tiah a chim chih.
US le North Korea hrocernak tlang a sang chin lengmang. Admiral Harry Harris nih a chim thanmi cu 'President Trump nih North Korea a kah ahcun ramdang zong a hnursuan dih hna lai. Missile in kan kah hna ahcun South Korea mipi tiang in tam tuk an thi lai.
South Korea ah kan chiahmi kan ralkap ca tiang ah a tihnung. Meeting chungah a chimhmi hna cu 'North Korea nih nuclear a ngeih hnuah cun Japan a siah, South Korea an siah US kan sinah tam deuh kan thi lai. Zeidah a tuah lai timi theih cia khawh a si a ti.
North Korea nih a kan kap lai lo timi hi cu kaa hrawm kho lo. Nuclear thil ti khawhnak a ngeih cang hnuah cun kan cungah a hmang lai lo ti khawh hrimhrim a si ti lo a ti. Cucaah Kim Jong-un hi a khupbilter si loin a lungfimter hi kan herh cemmi a si' tiah a chimh hna. Ref: The Express.