Kan hnu zarh thimnak (By election) nih NLD lungkhonnak le lungpuamnak vialte a titter dih cang lai tiah an zumh. 2015 thimnak ah khan cun mipi nih NLD dirkamh dih a rak si. Asinain kum hnih chungah zeitluk in dah mipi le NLD cozah an i hlat cang timi a fiang.
Nirukni ah khan thutnak an i cuhmi hleiriat (18) chungah pakua (9) te lawng an co cang. A luan cia kum hnih lioah khan cun mipi dirkamhnak 70% an hmu i tutan ahcun 50% hrawng lawng an hmu cang. Tlangcung ram pali chung i an i zuamnak ah pathum an sung.
NLD leiin biachimtu U Win Htein nih mipi a mawhchiat hna. Mipi hi an fim tuk i zeidah NLD cozah riantuan ning a si timi an rak zoh tuk. An rak um sawh lo. Kum hnih a vun kalmi NLD cozah nih mipi lung a tong lo tuk i tutan ah cun vote an pe duh tuk ti hna lo.
Mipi kut cung um an si ti hi mipi zong nih theihter pah cu an hau hrimhrim ko. 2015 ah cun NLD nih Mon State i Chaungzon khua ah teinak an rak hmuh, asinain naite ah mipi duh lo buin an hlei min ah Gen Aung San tiah an sak. Vote thlak caan a phan i USDP nih an tei diam cang hna. NLD mual a pho cikcek.
By election thimnak nih NLD cozah pi cu a thla kho lai lo nain mipi nih ruahnak ngei loin a kan dirkamh lo timi cu an fiang cikcek cang lai.
Shan State i thutnak pariat an i cuhmi zong ah pasarih bak te an sung. Shan Party le USDP nih buan an co. Tlangcung miphun lung an tong kho hna lo timi a fiang. By Election lai te ah Suu Kyi bia a chimmi cu 'mipi soiselnak kan cohlan khawh chung paoh cu kan nung ko lai' a ti.
Asinain soisel tiang lawng a rak za lo. Mipi nih an thlak hna ahcun an nung kho lai lo. Tutan thimnak nih a cawnpiak hna lo ahcun NLD caah ruahchannak hi tampi a um ti lai lo. Ref: Irrawaddy News.