North Korea lung a khon ning hi khuaruahhar a si. US nih ramdang namneh a hmanmi a ngol hlan chung paoh cu kan missile le nuclear hneksaknak kan ngol naisai lai lo tiah North Korea official pakhat Sok nih CNN biahalnak an tuah lio a chim.
Sok Chol Won nih a chim thanmi cu 'zeitik ah dah kan hneksak lai timi kan chim kho lo. Timhnak cu kan ngei cang. Ramleng lei cawlcangh zoh in a si lai' tiah a chim chih. Norh Korea nih kan ram runvennak ding caah cun a herh ning in rian kan tuan lai. Kan ram tuaitam le namneh kan duh lo a ti.
'Kan ralkap le kan ram thazaang thawnternak ding caah nulclear hneksaknak hi a biapi tukmi a si. America nih huatnak in a kan namneh chung paoh cu kan missile le nuclear hneksaknak hi kan ngol lai lo' tiah a chim. Hi tluk in an linhsat lio i North Korea nih a nuclear a hneksa cicet ahcun an zual cang lai.
US le South Korea raltuknak tilawng phu nih an um hnawh dih cang. Thil poipang vun cang seh law cipkhap ti loin an phomh khawh colh lai. South Korea ah THAAD missile a chiahmi zong a rauh hlanah a nung colh lai tiah zumh a si. A nun ahcun North Korea cu zeihmanh a rel ti lai lo.
North Korea official Sok nih nihnihni ah a chimmi cu 'kan ralkap kum 85 tlin kum camtuak kan tuahmi hi US President ralrin kan peknak a si. US nih a kan namnehnak duh lonak le hrocernak kan tuahmi a si' tiah a chim.
Nithumni ah Inn Raang ah US Senate tonnak an ngei i, North Korea kong an ceih. Korea hrawngah daihnak le himnak kan duh. North Korea nih nuclear ngeih ding cu a si kho lo. A herh ning in kan kham lai. Asinain biaruahnak lam zong kan on ko rih. Asinain a herh ning in kan ram le kan hawile kan runven hna lai' an ti. Ref: CNN News.