President a tuannak ni 100 hrawng a kal cang. Zalong taktak in a tlongleng kho i, nunnak duhdim taktak in a hmang lengmang cangmi spuaizi minung caah cun a nunnak nih a teh bal lomi politician pakhat bantukin Inn Raang ah thong vun tlak colh cu a fawi hrimhrim lai lo.
'Ka nun thing kha ka hlam riangmang ko cang. Ka duhmi zeihmanh keimah tein kaa tuah kho ti hna lo' tiah President Trump nih Reuters a chim. 'A fawi ngai ding ah ka rak ruah nain ka nun thing naak in a rak har deuh' a ti. January 20 ah khan Inn Raang ah a lut i atu hi ni 100 hrawng US pi a mong ve cang.
Trump nih a chim thanmi cu 'atu cun thlithup (privacy life) nun ka ngei kho ti lo. A tlawm tuk cang. Congtu (secret service) nih suimilam 24 chung congh lengmang ka si cang. Kanmah duh paoh in khawika hmanh kal khawh a si ti lo. Kan bawm chungah hren peng ka si cang' a ti.
'Inn Raang ka chuah ah hin zultu khat thup in an um. Ka nun thing ah khan cun keimah tein kaa mongh khawh i duhnak hmun ah kan kal kho. Pawngkam ah congtu le hnursuangtu um loin zalong tuk in ka um kho. Atu cun keimah te hmanh in ka mong kho ti lo' tiah Trump nih a chim chih.
Atu ning tein a nun thing a hlam peng ko ahcun a term hnihnak cu a mang hmanh ah manh a duh ti lai lo. Inn Raang chuah tak zokzok lawng duh cang seh law kan thei lo. A hlanah zalong tuk in a nung i aa nuammi cu Inn Raang rian nih a tlaih dih cang.
Laimi kan dirhmun a kan theihter ngai. Kan ram le kan khua ka chuah tak i ramdang kan phan hna.
Kan khua le kan ram le kan nun thing kan hei ngaih hna ning kha chim thiam ding hmanh a si lo. Zeitik ah dah Laimi ah kan tlun lai i, kan nun thing ah kan nun than lai timi chunmang lawng kan hmanh hna. Kan tlangram kal kha chunmang ah an cuang i kan tiva kal kha chunmang ah an cuang hna.
Kan fing le kan tlang le kan nelrawn vialte cul than ah kan ngai tuk cang hna. Asinain Inn Raang ah zeihmanh tuah kho loin hren cio kan si cang. President Trump zong Laimi bantukin a Lairam (a nun thing) te kha a ngai ruangmang ko cang rua mu!