US Secretary of State Rex Tillerson nih ningani ah North Korea cu ralrinnak a pek cang hna. 'North Korea nih nuclear le missile program ser a ngol lo ahcun buainak fak tuk a chuak te lai' tiah ralrin peknak bia a chim. A thaizing nirukni ah North Korea nih a missile a hneksak colh.
US le South Korea nih an chimmi cu 'North Korea missile a tlolh' an ti. March thla in atu tiang ah North Korea missile a tlolh a voilinak a si cang. Korea rili hrawngah US raltuknak tilawng lianlian an rak phanh i eksaisai an tuah ni tlawmpal ah a hneksakmi a si.
North Korea lungkhonnak langhtertu pakhat a si. North Korea kongah UN Security Council an thu i US Secretary of State Rex Tillerson nih a chim nolhmi cu 'North Korea nih a missile le nuclear program a ngol lo i a pehzulh lengmang ahcun Trump cozah nih kan duhmi paoh kan tuah cang lai' a ti.
UN ah Tillerson nih hi bia a chimmi cu a sawhsawh a si ti lo. North Korea kongah kan dirhmun fiang tein kan chim cang. Nan kan theih pi cang tbk khi a si cang. South Korea caah zeitluk in dah an tihnun nan theih. Japan caah zeitluk in dah an tihnun nan theih.
Cun a rauh hlanah North Korea nih US a kap khomi hriamnam a ngei cang lai. Atu ah kan kham khawh lo ahcun tihnung tukmi hmun ah an kan phanh pi lai tiah fiang tuk in UN Security Councl chungah a chim. Taluk nih zeital a tuah te lai maw ti lawng an zoh ko cang.
Asinain Taluk nih 'North Korea kong hi kanmah cungah lawng ah a ummi a si lo. Biaruahnak in kan phisin than a hau' tiah Taluk foreign minister Wang Yi nih UN ah a chim.
Asinain Secretary of State Rex Tillerson nih cun 'North Korea he biaruahnak kan tuah kho ti lai lo. An rak buar cang. An buar cangmi a thar in biaruahnak in laksawng pek kan tim ti hna lo' tiah fiang ko in UN Council cu a chimh hna. A dih rih lo. Zeitiang dah a phak lai te lai! Ref: Reuters.