Ningani ah U.N. Security Council an thu i mi lianngan lawng te an thu hna. US Secretary of State nih 'North Korea hi kan kham khawh lo ahcun nuclear le missile program nih tihnung tukmi buainak a chuahter te lai' a ti. Taluk le Russia nih 'ralkap in cun tlangtlak lo ding' an ti ve.
UN meeting ahcun US nih Taluk deuh mawh a phurhter hna. Taluk nih North Korea chak rengh khawh hi a biapi tuk tiah a chim. Taluk leiin Foreign Minister Wang Yi nih 'Taluk lawng hi North Korea buainak a phisin khomi kan si lo' tiah Council chungtel hleinga hna hmaiah a chim.
A chim thanmi cu 'North Korea nuclear buainak kong daihnak ding caah cun Taluk kut cung lawng ah a um lo. Biaruahnak in kan phisin hmasa lo a hau' a ti. Rex Tillerson nih a leh thanmi cu 'North Korea he biaruahnak kan thok hlan hrimhrim in a nuclear program hi donghter seh' tiah fiang ko in a chim.
Taluk leiin Wang nih a chim thanmi cu 'Ahodah a biapi, a hodah a thok hmasa lai, a hodah a hmaan i a hodah a palh timi kan biaalnak hi kan dongh a herh. North Korea missile le nuclear program kongah biatak tein biaruahnak kan thok than a hau' tiah a ti.
US leiin Tillerson nih duak a leh colh ve 'North Korea he biaruahnak kan rak ngeih ciami ah kan kir than kho ti lo. Kan biaruahnak zei a rak rel lo ruangah a luan cia kan biachahnak a rak buar cang fom cu! A buar cangmi kha a thar in biaruahnak in laksawng kan pe kho ti lo. An ziaza tha lo kha biaruahnak in laksawng pek kan tim ti hna lo' tiah fak ngaiin Wang cu a den.
Missile le nuclear program raungah 2006 ah UN nih dan a rak tat cang. Dong loin nuclear voinga tiang a hneksak than ruangah a hnuah dan an tat chap lengmang. Nizan tihni i a voikhatnak UN meeting a kainak ah Secretary of State Tillerson nih UN Security Council cu a sik len hna. North Korea cungah nan riantuanmi a rak tlawm tuk.
UN pumpi nih tuan tein rian rak tuan u law atu bantukin North Korea nulclear le missile kongah kan buai ti hnga lo. Cucaah North Korea nih poipang a tuah manh hlanah diplomatic pehtlaihnak in a siah sipuaizi in a siah reng cang hna u sih. Atu ah kan rengh khawh lo ahcun tihnung tuk dirhmun ah kan phan lai' a ti hna. Ref: Reuters.