Tu zarh nihnihni ah Syrian ralkap nih Syrian raltho hmunkur umnak khua Idilb ah sivaidat hriamnam in an kah hna i mipi hngakchia telh 100 hrawng an thi. Nithum a rauh hnuah President Trump nih fak taktak in a lehrul colh hna.
Tomahawk missile 59 bak tein an kah hna. Mediterranean rili cungah a ummi an raltuknak tilawng in an kah. An kahnak hmun hi sivaidat in mipi an kahnak hmun a si tiah an ruahmi a si. A hnuah an vun theih thanmi cu Syria nih rak hmanmi si loin Russia tu nih an rak hmanmi a rak si.
2015 hrawng in Russia nih ISIS dohnak ah an rak hman cangmi a si. Syria cozah a dohmi Syrian raltho hna dohnak ah a hman chihmi zong a si. Tangka tam tuk dih in an hmanmi a si i, an hriamnam le thilri biatak thazaang an pek chin lengmang naak hmun zong a si.
Ningani zing in cun fak tuk in a rawk cang. US nih a kah lai hna ah Russia sinah theihternak an tuah ko nain tutan an kah hna ahhin zeiruangah dah Russia nih aa runven lo. An missile in Tomahawk hi rak thlak khawhmi a si. Asinain Russia dai tein a um.
Airbase ah a ummi vanlawng hna hi Soviet-era MiG 23, MiG 25 le Su 22 tbk raltuknak vanlawng hna an si. UN defence official nih an chimmi cu 'tha tein Russia sinah theihternak kan tuah ko hna' a ti. Russia nih an thilril le hriamnam an fim manh hna lo maw a si hnga kan thei fiang rih lo an ti.
Syria media nih an chim ning ahcun minung paruk an thi a ti. Syria ralkap upa pakhat nih a chimmi cu 'a hrawhmi a fak ngai' a ti. US lei zong nih an chimmi cu 'kan kahnak hmun kan hrawh dih' an ti. Tomahawk 36 hi USS Rose raltuknak tilawng in kan kah i 23 hi USS Porter raltuknak tilawng in kan kah an ti.
Atu zong hi sivaidat a hmangmi hi Russia a si ko lai tiah an lunghrinh cang. Hlaihlai ding in timhnak an ngeih cuahmah lio hna a si. An konglam a dai rih lai lo. Ref: CNN.