Russia nih a chimmi cu 'Syrian mipi a thattu hna sivadat hi Syrian cozah dohtu raltho hna hriamnam a si. Syrian cozah ralkap an si lo' tiah an chim. Asinain Britain Foreign Minister, raltho hna hruaitu le expert dang hna nih cun 'a hmaan lo. Syrian cozah ralkap an si ko' an ti.
Russia nih an chim thanmi cu 'Idlib peng i Khan Sheikhoun a kaptu hi Syrian raltuknak vanlawng an si ko. Asinain sivaidat an hmangmi an si lo. Raltho nih an i chiahmi an kah ruangah a puakmi a si' tiah Russian defence ministry biachimtu Igor Konoshenkov nih a chim.
'Mipi lakah sivaidat a hmangmi kanmah kan si lo' tiah Syrian cozah nih an i pheh ve. UK Foreign Secretary Boris Johnson nih cun 'Syrian cozah hrimhrim an si ko. A mipi cungah dawhcah lo hriamnam a hman' a ti. Russia nih an chimmi hi 'lih' a si tiah Syrian raltho hruaitu nih a chim.
Brussels i Syria kong an ceihmi cu a linsa hringhrang ko. Atu hi an hlathlai cuahmah lio a si i bia fiang taktak theih a si rih lo. Thawngpang fiang an theih cangka in UNSC meeting an thu colh lai i an ceih than lai.
Sivaidat a tuarmi hna video zong a rak chuak i an temtuar ning zoh ah zaangfak taktak an si. An thaw an chuah kho lo. An kaa chungin buan an chuak. A sawm hna. Minung 100 hrawng an thi i hngakchia le nu zong an i tel hna.
A hmutu nih a chimmi cu 'Syrial raltuknak vanlawng nih hliamhma a ingmi zohkhanhnak sekhaan an ral khun' a ti. Sivaidat aa hakmi pakhat nih a chimmi cu 'Gas kan i hak ahhin kan dir kho lo. Kan lungmit. Kan thaw kan chuah kho lo' tiah a chim. Ref: BBC.