Syrian ralkap nih sivaidat hriamnam (chemical gas) an hmanmi cu a tihnung hringhran ko. Syrian raltho bu umnak khua Idib i Khan Sheikhoun ah a kah hna i, a rauh hlanah minung 100 an thi colh. Cu chungah nu le hngakchia an i tel. Van cung i a zuangmi va tiang in an tla.
Sivaidat in a kah hna ahhin sivaidat thli thurhnawm a dawpmi paoh cu sok an ngan dih. An kaa chungun buan an chuak, a hnuhdawh hna i, an sawm hna. An thih dan hmanh hi zoh ah tihnung an si. A sawm in a sawm hna. Iraq le Iran an rak i doh lioah Iraq nih a rak hman cang i a rak tihnung kho tuk.
Russian dirkamhmi Syrian President Bahshar al-assad cungah mawh vialte a tlung dih cang. Vawleicung hruaitu upa vialte an thinhung dih. UN meeting a rannak in an auh i an ceih cuahmah lio a si. Zeitin dah biachahnak an tuah lai timi theih a si rih lo. Fak piin dantatnak biachahnak an tuah lai tiah zumh a si.
UK Prime Minister May nih fak taktak in Syrian cozah a mawhchiat colh hna. Assad cozah hi donghter cang tiah Russia zong a auh colh hna. Russia hi Syrian cungah mual a ngei cem a si caah Russia zong an mawhchiat len lai. President Trump zong nih fak taktak in a mawhchiat.
Sivaidat in a tuar mi hna
Zohkhanhtu doctor nih an chimm i cu 'an thi zong a um lo; an i khawnnak zong a um lo. nu, hngakchia le upa he thawchuah kho loin an um dih. An kaa chung in buan an chuak i an con dih thluahmah. Van cung i a zuangmi va tiang an tla i an thi colh' tiah a chim.
Syrian Observatory for Human Rights nih an chimmi cu '18 an thi hmasa, cun 35 an thi i atu cun 100 tiang an thi cang. Hngakchia 11 an i tel' an ti. A chim thanmi cu 'a kaptu hna hi Syrian ralkap an si ko lai tiah kan zumh. Kahnak ah hliam hma a ingmi zong 400 an si' tiah an chim chih. Ref: The sun.