Minung nunnak le thanchonak caah a biapi tukmi hmun a tlaimi pakhat cu mei hi a si. Ralkap uknak chan ah khan cun mei mangtam nih a kan tlunh i mei kongah harsat tuk in kan um hna. Kan fimthiam cawnnak tiang in kan hram a rak kan phalh dih.
Asinain mipi cozah a kai hnuah ruah loin mei kan hmu i kan hna a ngam tuk cang. Asinain mei man kongah buainak le phunzainak hi dong loin a um lengmang than. Mei kong le electric kong a thei lomi Than Tlang le Hakha nupa hna cu namneh an tong lengmang.
Zeiruangah dah mei man hi zatzat cu kan si (ciah) hnga tiah ruah awk hngal chungkhar tampi Hakha le Than Tlang ah an um hna. Zeihmanh theih lo cang ahcun hal ning tein liam lengmang a si. Hitihin a kal lengmang awk a si maw? Electric zung leiin mei man (bill) a rami a si an ti cang ahcun al awk an tha ti lo.
Kan al hna ahcun dantat chin chap aa huat ding kan si. Citicun mei man kongah lung fiang loin a ummi chungkhar kan tam cang tiah an phunzai ngaingai hna.
Than Tlang ah chungkhar pakhat nu-va lawng khuasa an si i, thla khat ah 15,000 in 18,000 hrawng lengmang an liam. A luan cia ahcun 6,000 in 4,000 karlak hrawng an rak liam lengmang, asinain ruah lo piin mei man a kai ciammam i awlokchong in an um cang. Electric an hmanmi a tlawm fawn ko.
Cheukhat cu thilsuknak, frit (fridge) le a dangdang an hmang i 6,000 lawng hna an liam tiah minung pakhat nih The Chinland Post ah a chim. A chim thanmi cu 'kanmah lawng kan si lo. Mi dangdang zong a vuivaimi an tam tuk' tiah a chim chih.
Mei zung nih mei hman ning hi phun hnih in an then. Sipuaizi caah mei a hmangmi le chungkar hman ning tiin an then. Chungkhar in mei man an hman ning hi Unite 1 in 100 tiangah Kyat 35 lak an si. Unit 100 in 200 tiang a hmangmi hi Kyat 40 lak an si i, Unit 200 in a cunglei a hmangmi paoh cu 50 an lak hna.
Mei zung leiin a si khawh tawk in mipi sinah fianternak kan tuah lengmang ko tiah mei zung riantuantu upa Mawng Hlun nih The Chinland Post ah a chim ve.
Mei hi minung kan nunnak ah biapi tuk i, mipi nih duhdim tein hman khawh a rak herh tuk. Chungkhar khuasaknak tiang lawng si loin Laimi sianginn a kaimi vialte duhdim tein hmanter khawh hi riantuantu upa rian sunglawi cem zong a si.