US cozah nih thlithup in nuclear bom an rak hneksaknak video pawl an chuah hna. 1945 in 1962 karlak hrawngah an rak hneksakmi hna an si. An rak hneksak lioah cun lengah langhter an duh lo nain naite lawng in an vun langhter hna.
Hi chan lio hi Soviet Union he nuclear hriamnam thazaang an rak i zuamcawh lio a si i, an rak roipui ko. Zeiruangah dah an video an vun chuah thluahmah timi theih a si rih lo. Lawrence Livermore National Laboratory official Youtube ah nilini ah khan an vun tar hna.
Nuclear bom hi tih a nung tuk timi cu kan theih nain video zoh hnuah an tihnun ning a lang chin lengmang.
Nuclear bom an rak hneksakmi zong an tam i, video an rak lakmi zong an tam. Ralpi Pahnihnak a dih in Cuban Missile Crisis (1945 -1962) chung vialte i an hneksakmi video hna an si. Lawrence Livermore National Laboratory nuclear weapons physicist Greg Spriggs nih a chimmi cu 'an hlun tuk cang' hna a ti.
'Kan chiahnak inn ka vun on cu an rim zong an nam tuk cang. An zate in 10,000 hrawng an si i 6,500 hrawng lawng kan hmuh khawh rih. Film expert Jim Moye bawmhnak thawng in 4,200 hrawng kan tharchuah (scan) khawh cang hna' tiah a chim chih. Ref: Newsweek & BBC News.