US a thinhun ve cang ahhin cun zeihmanh nih kham awk a tha lo. Russia nih a ka dirkamh ko ti phun in Syrian President Bashar al- Assad le a ralkap an i leksuai tukmi cu President Trump nih an vun kingh colh hna. Syria raltuknak vanlawng chiahnak hmun vialte cu US missile hma in an nak dih.
Russia nih an vun aukhuanh colh ve. Syria a kahmi cu 'hramhram namneh' a si tiah Russia President Putin nih a vun ti ve hna. 'International phung zong an buar' a ti. US nih a Tomahawk missile 59 bak tein a kah hna. Minung paruk an thi tiah report nih a chim. Syrian MP Fares Shehabi nih fak ngaiin a chim.
A chimmi cu 'Syria ramchung ah theih pinak tel loin a rak lutmi ralkap hna cu kan ram hnahnawhnak pek ah kan ruah lai i, a herh ning in kan cawlcang colh lai. US nih kan airbase an kahmi cu hruk cawlcangh pakhat a si' tiah fak ngaiin a chim. A chim duhmi cu atu lio Syria ah US ralkap a ummi zong hi a herh ahcun kan kah khawh ko ti he aa khat ve cang.
'Sivaidat aa telmi hriamnam hman hi US nih ka cohlan khawh lomi a si. Inn Raang cawlcangh upat an tlak. Russia le Iran nih caan tha laa in Syria ah biatak in an thazaang an langhter lengmang. US security an nuarsual lengmang. Nilini zan kan kahmi nih US cozah dirhmun fiang tein a langhter cang lai. A pakpalawng in kan holh ti lo timi a langhter' tiah Texas Congress pa nih a chim.
President Trump le Taluk President Xi Jingping zong Florida ah tonnak an ngei lai. North Korea kong an ceih rih lai. North Korea zong a lau cang lai.
Syrian President Assad nih cun 'Trump khuakhan hi hruh a si' tiah fak ngaiin a zai. 'American thil tuah hi hruh bia a si. Politics leiin a siah ralkap leiin a siah khua an hmuh lonak a langhtertu a si' tiah fak ngaiin a chim. Russia nih an chimmi cu 'an kahmi a hmual a um lo. 59 chungah 23 lawng nih an kahnak hmun an phanh an ti.
Syria ram runvennak thazang kan thawnter lai tiah Russia Defence Ministry leiin Igor Konashenkov an chim. Turkey i Russia embassy hmaiah sandah an rak piah len hna. President Assad le Putin hi thah hna u an ti. France le Germany nih 'President Assad ruangah a si. Hi tiang dirhmun hi Assad tuahsernak ruangah a si an ti.
Syrian refugee nih pa nih lunglawmhnak a chim. "Refugee ka si bantukin hi bantuk in bia ka chim lai hi kaa ruah bal lo. Ka ram in a ka thawltu Assad cozah na kahmi cungah Donald Trump, kaa lawm tuk. Kap rih ko' tiah twitter ah a tial. Ref: BBC.