US le International community nih an thlolh lengmang bu le ralrinnak an pek lengmang buin zarhpini ah North Korea nih missile a hneksak than. Tutan cu a hlannak in a tha deuh cang an ti. North Korea nih atu zong fak taktak in US hrocernak bia a vun chim len than cang.
US nih a kalnak lam aa palh i hnulei a kir than lo ahcun ka missile le nuclear kan hneksak than lai. North Korea nih kan lung kan thum naisai lai lo. US le a hawile nih a hmaanmi biacahnak an tuah hlan lo cu kan nuclear kan hneksak chin lengmang cang lai tiah Jong-hak nih a chim.
North Korea diplomat Pak Hong-hak nih Asian Nichuah-Thlang meeting an ngeih lioah a chim thanmi cu 'lamhla a kap khomi ICBM hneksak ding in timhnak kan ngei rih. A sang ngai cangmi nuclear zong kan hneksak than rih lai' tiah a chimh hna.
US a phomh kho dingmi nuclear le missile a ser cuahmah lio a si tiah an zumh. Tutan a hneksakmi zong a zuannak lam in tuak ahcun meng 1,312 hla a kal. US zong a phanh khawh men ko lai tiah an zumh. A hlat le a neih in cun meng 489 hla tiang a kal kho. Tu kum chung a hneksakmi vialte ah a tha cem a si.
Aerospace engineer John Schilling nih a chimmi cu 'a hnu bik a hneksakmi nih North Korea thil ti khawhnak a langhter cang. North Korea ah hi bantuk thiamnak le thanchonak kan hmu bal rih lo. US caah ruah awk ngai a si cang' tiah a ti. Ref: The Express.