Zarhpini zing i North Korea nih missile a hneksakmi hi Russia in meng 60 hrawng aa hlatnak rili cungah a tla tiah US nih an chim. Hawaii Pacific University ah professor a tuanmi Carl Schuster nih a chimmi cu 'Russia zong kan in tongh khawh ko tiah a chimh duhnak hna a si' a ti.
North Korea missile hneksaknak nih a langhtermi cu Taluk zong Russia zong tongh kan in duh hna ahcun kan in tongh khawh thiamthiam ko hna tiah a langhter duhnak a si. 'Zei ti poah in ka ruat u. Kan zeihmanh a poi lo. Duhmi paoh a tuah khomi ram kan si' ti a chimh duhnak hna a si a ti.
Zarhpini ah Taluk President Xi Jinping le Russian President Putin le ramdang hruaitu upa hna cu Taluk ah tonnak an ngei lai i, chawlehthalnak kong an ceih lai. North Korean lei zong an i tel lai. Cucaah North Korea nih hi bantuk caan theng te ah missile a hneksakmi cu a sawhsawh a si lo tiah a chim chih.
US le North Korea buainak kongah Russia hi a holh lo. US le International community pawl nih North Korea dan an tatmi kongah hin Russia zong holh pah seh ti an duh caah Russia pawng tiang missile an kahnak a si. 'Holh ve, kan dirkamh ve' tiah a chimh duhnak hna a si. Hihi North Korea thil ti ning cang taktak cu a si' tiah a chim chih.
Japan naak hmanh in Russai ah neih deuh in a va tla. US nih an zumh ning ahcun Russia lung a tling hrimhrim lai lo an ti. 'North Korea dan kan tatmi hi rengh deuh a hau cang' tiah US Inn Raang nih cun International Community an auh colh hna. Taluk lei nih cun 'kan i sum cio a hau' tiah an vun chim colh ve. Ref: CNN News.