North Korea he ralthawh tim hrimhrim hlah tiah US cu Russia nih ralrinnak a pek. Hnuleiah na kir tak than lo ahcun buainak nih a chuahter dingmi hi tih a nung tuk tiah Russian President Putin nih a orh lei kut bantukin a hmanmi Sergei Lavrov nih a chim.
US nih North Korea hi nuclear ngeihter lo ding in a timh lengmang ko ahcun tihnung tuk thil a cang khomi a si tiah a chim chih. Nuclear hlawt hi North Korea caah nunnak hlawt tluk in an ruahmi a si tiah Global Times nih cun a tial. Taluk le Nuclear ah hin pakhat poah thim ding si hna seh law nuclear kan i thim ko lai tiah fiang tuk in an chim fawn.
Atu zong North Korea nih a vuiruknak nuclear a hneksak lai maw hneksak lo timi an cuanh cio cuahmah lio a si. North Korea nih nuclear a hneksak than sual lai ti hi an phan ciomi a si.
A voiruknak nuclear a hneksak ahcun thil tihnung poipang a cang kho cangmi a si. President Trump nih phone chungah Putin sinah a chimmi cu North Korea nih nuclear a hneksak than ahcun kan cohlang kho ti lai lo a ti. Putin zong nih 'daihnak in kan damter awk a si' tiah a leh.
Larov nih a chimmi cu 'North Korea nuclear buainak kongah hin damternak lam pakhat lawng kan ngei. Ralkap in damter kan timh ahcun tihnung tuk dirhmun ah kan phan ko lai. Dai tein hi kong cu kan kan sersiam a hau. Talkap in damter phun a si lo' tiah a chim.
Norh Korea hi a lungkhong bak ve i Taluk he zong an i khukkhak cuahmah lio a si. Nuclear lam na zulh lengmang peng ko ahcun Taluk he kan kal ti kho ti lai lo. Na nuclear program he cun kan kan in thihruai kho ti lai lo tiah fiang ko in Global Times nih a tial cang. North Korea caah cawnpiaktu tha a si lai tiah an zumh. Ref: The Express.