Saudia Arabia ah President Trump nih $110 billion man hriamnam zuar ding in Saudia Siangpahrang Salman he hnatlaknak le minthutnak an ngeih cang. An pek colh fawn hna lai. Inn Raang chim ning ahcun US tuanbia ah a tam bik hriamnam kan zuar a si a ti.
Zei bantuk thilri le hriamnam dah an zuarhmi hna an si timi fiang tein theih a si rih lo. US State Department nih a chimmi cu 'ram runvennak missile, ralkap tilawng, helicopter, thlithup hlathlainak vanlawng, tank le miakpi tbk hna an si lai' a ti.
US Inn Raang leiin an chim thanmi cu 'Saudia Arabia sinah kan zuarmi hriamnam hi Iran thihpheihnak le hrocernak in an i runvennak caah a si lai' a ti. Iran le Saudia Arabia hi aa ral zungzalmi an si. Asinain khatlei in Israel lungre a rak thei ziar. Trump cungah thinhun ding an ngei ngai cang.
Tutan Trump nih Saudia Arabia sinah a zuarmi hriamnam hi a thatha lawng te an si. Cu hlanah cun US nih Muslim ram ah Israel naak in hriamnak tha deuh pek le zuar aa tim bal lo. Israel naak in an hriamnam a that deuh ahcun Israel an tei sual lai an ti. Israel hi a zei poah in an thawnter deuh lengmang.
Tutan hriamnam a zuarh ning an zoh tikah Israel liang taawng in Saudia Arabia thawnter an duh caah a si tiah Israel lung a tling lo ngai. Israel Minister upa Yuval Steintz nih a chimmi cu 'Saudia Arabia cu a kan huami ram a si. An hriamnam cawkmi hi a kan dawntu a si awk hrim a si lo' a ti.
Minister Ayoub Kara nih a chimmi cu 'Israel le Sunni Muslim karlak ah pehtlaihnak a tha ngai ko cang nain Saudia Arabia cu zei tik paoh ah aa thleng khomi an si. Anmah naak in a thawng deuhmi kan sinak hi tihnung hmun ah a um awk a si lo. Prime Minister Netanyahu zong ka chimh te lai' tiah a chim. Ref: TOI.