North Korea i 'Institute for American Studies of the Foreign Ministry biachimtu nih Kim Jong-un aiawh in a chimmi cu 'US nih a kan huat chung poah le namneh a kan timh chung poah cu kan nuclear program kan ngol lai lo. UN zong a vun phomh chih cang hna.
Kan nucear thazaang kan thawnter chin lengmang lai. Rang taktak in US phomh khawhnak thazaang zong North Korea nih kan ngei cang. Cun UN nih US hi tha tein a cawnpiak lo i, a tuahser vialte an cawiliamhter tung lo ahcun UN nih North Korea cungah biachahnak a tuahmi kan cohlang lai lo a ti.
North Korea cungah UN Security Council biachahnak cu nichuak menmen ah kan ser lai. Zeihmanh ah kan rel lai lo. Kan ram runvennak kongah nawl a ngeimi cu kanmah kan si. US namneh hmannak le tuahsernak tha lo hi an tlangtlak khawh tung lo ahcun kan ram cungah zong ah mawhchiat khawhnak nawl an ngei lai lo a ti.
US nih dong loin a missile a hneksak lengmang. A chimmi le a tuahsernak hi aa kalh lengmang. North Korea nih hneksak hlah seh a kan ti i, anmah cu an hneksak lengmang. Kan hneksakmi cu daihnak le himnak caah a si an ti i, kanmah hneksaknak cu thinhunnak chuahtertu a si an kan ti.
Hi bantuk ziaza le lungput hi kan cohlaang kho lo. Kan nucear thazaang kan thawnter chin lengmang lai. Kan runvennak kongah kan duhmi paoh kan tuah lai i, ahohmanh nih mawhchiatnak kan tuah hna hlah seh tiah fak ngaiin US le UN cu an vun phomh than hna. Ref: The Express.