Elle Dingman hi a umnak local hmun ah a free tein rawl ei awk a ngei lomi phawtzamh awk ah aa pumpemi a si. Missouri i Branson hotel pawngah hngakchia kum hnih pa te Ryder he an i tong. Hmun kip ah rawl phawt ah a vak tawn nain Elle nih a hmu bal lo.
Voikhat cu an i tong i Ryder nih Elle kut a vun tlaih. Elle nih a chimmi cu 'duh a nung. Ka kut a tlaih i a thlah duh ti lo' tiah a chim. A phone aa chuah i hmaan a thlak. A facebook ah a tar. Ca a tialmi cu 'a kuttlaih khawhnak caan tha ka ngeihmi le dawtnak caan tha tawite kan ngeihmi cungah kaa lawm tuk' a ti.
US ah fale telh chih in chungkhar ei awk ngei lomi $13.1 million an um. Cu chungah Ryder zong aa telmi kum hnih hngakchia te a si. Ryder a nu nih a chimmi cu 'rawlei awk ngei loin kan um caan a tam' tiah a chim. Fano te a ngeihmi aa cawi pah buin a chim.
US ah hin khuapi chung minung tamnak khua kip ah hin chungkhar ei awk ngei lo 12.2% an um i khualeng kiangkap deuh ah hin 15.4% an um.
'Jesuh Nih Inn A Ngei Lo' timi mi harsa zohkhanhnak a dirhtu Bryan Stallings nih a chimmi cu 'state tampi chungah Missouri hi hngakchia ei awk ngei lo an tam biknak hmun a si. Asinain kan community nih kan bawmh khawh chin lengmang hna' tiah a chim.
Mah tein a dirmi bu an si i zarh tin in minung 1,400 hrawng hi ei awk kan pek lengmang hna. Cu chungah hngakchia 700 hrawng an i tel tiah a chim. US hi vawleicung ah rawl a ngei bik an si ko nain zeiruangah dah hngakchia ngei chungkhar ei awk ngei loin an um lengmang?
Stalling nih a chimmi cu 'kan cozah ngandam phung nih hin rawl tam tuk an kan hlonhter lengmang. Restaurants kip nih rawl an hlonh sawhsawhmi a tam tuk. Rawl ei awk a ngei lomi hna sinah pe hna seh law zeitluk in dah a that hnga. That lo tuk bia a si. Kan innpa sinah then u sih law a tha tuk ding a si ko' tiah a chim.
Kum tin in kan hlonhmi rawl hi $165 billion man lengmang a si. 25 million minung nih an i zat dingmi rawl a si. Rawltam doh hi kan rian nganbik pakhat a si cang. Setzung tha kan ngeih ti hna lo caah kan harsa chin lengmang cang. Riantuan ding tampi kan ngeih a herh a ti. Ref: CNN News.