Russia nih Crimea le Ukrain a lak te lai tiah a rak chimchungtu US ralkap lei expert zong a si i, Washington DC i National Defence University ah professor a zong a simi Paul D Miller nih World War III cu Latvia in aa thok te lai tiah a chim.
Russia nih Crimea a lak te lai timi hi 2014 ah a rak chim cang. Atu ah a chim thanmi cu Latvia a si loah cun a pawngah a ummi Estonia hi Russia nih lak ding list ah aa chiahmi a si a ti. Europe ramchung ah a ummi a si i NATO chungtel zong a si.
Russia nih a lak tak ahcun United States nih khamh ding in a rat hnawh hrimhrim lai. US nih a rat hnawh ahcun WW III hi a chuak lai tiah expert ngaimi Paul D Miller nih a chim. NATO ram nih biakamnak a ngeihmi cu kan chungtel pakhat hi ramdang nih an kah ahcun kan zapi in a kan kah ah kan ruah lai i, kan i bawm dih hna lai tiah biakamnak an tuah.
Russia President Putin nih nihin ah a chimmi cu Trump hruaimi cozah he a rawkmi kan i pehtlaihnak hi kan remh lai a ti. Asinain US le Russia pehtlaihnak hi a chia ngaingai. Crimea a lakmi zong ah US a lungtling rih lo i, Syrian cozah a bawmhmi zongah US lung a tling lo.
Paul nih a chim thanmi cu Million pahnih lawng a simi Latvia hi ralkap in a la lai lo nain Latvia ramchung ah tuksawhnak in mipi buainak a chuahter te lai a ti. Crimean bantukin Latvian hi 25% cu Russian an si. Ramchung mipi an buai tikah special training a ngeimi Russia ralkap nih an chuah hnawh te hna lai a ti.
UN nih daihnak kan serpiak hna lai an ti zongah Russia nih a veto in a khamh lai i, an buainak ka phisin lai tiin Russia nih a tlangtlak te hna lai tiah a chim chih. Expert dangdang zong nih an ruahmi cu Putin hi raltuknak taktak in khuakhan thiamnak in hlawhtlin hi aa tim deuhmi a si an ti.
Latvia ramchung ah hin nitlak ram a tanhmi dohnak le soiselnak a tam chin lengmang cang. Nitlak ram a tanhmi hruaitu hna kha Russian a tanhmi hruaitu in thlen an i zuam chin lengmang cang hna. Putin nih a chimmi cu NATO nih an hmunhma an kauhter lengmangmi hi ka khamh cang lai a ti tiah RIA News nih a chim.